Ты кечылаште «Кугарня» газетын пашаеҥже-шамыч Морко районын ик мотор верыштыже – Эҥерсолаште кундемыште лийна. Морко-Шолэҥер кугорно дене райрӱдӧ могырыш кайыме годым Кокласола деч ончыч Эҥерсола кодеш. Тудым мыланемат ятыр гана эртен кудалаш логалын. Кум Вончӱмбал дене лудшына-влакым лишкырак палымым ыштена.
Эҥерсолам рӱдӧ яллан шотлаш лиеш. Тыште школ, икмыняр кевыт, верысе администраций, почто, ФАП верланеныт. Пошкудо ялла гыч икшыве-шамыч тысе школышто шинчымашым погат. Нуным автобус тышке-тушко кондыштара. Ялыште оралте-влак чапле, мотор улыт. Тугеже ты ялын ончыкылыкшо ӱшандарыше манын шоналтет. Тушечын корнына Элкэҥер, Кӱчыкэҥер, Вончӱмбал могырыш шуйналте. Вончо эҥер ӱмбалне верланымыштлан ялла-влакым Вончӱмбал, Усола Вончӱмбал, Памашсола Вончӱмбал манын лӱмдымӧ.