13 сентябрьыште Марий Элым Вуйлатышын пашажым жаплан шуктышо Ю.Зайцев Волжск олаште лийын.
Марбумкомбинат
Марий целлюлоз-кагаз комбинатын пашаеҥже ден ветеранже-влакым предприятийын 88 ияш лӱмгечыже да Чодыра пашаеҥ ден пушеҥгым перерабатыватлыше промышленностьын кечыж дене саламлен.
Кодшо ийын комбинат 13 млрд утла теҥгеаш сатум ыштен луктын. Ӱмаште тысе материально-технический базым вияҥдаш 1,5 млрд теҥгем ойыреныт.
Комбинатын ныл социальный объектше уло: тӱвыра пӧрт, спортзал, «Марбум Арена» комплекс да бассейн. Яльчик ер воктене идалык мучко канаш верым ыштыме.
Ю.Зайцев пашаеҥ-влаклан Марий Эл Республикысе Правительствын почётан грамотшо ден Республикым Вуйлатышын тауштымашыжым кучыктен.
