Волжскышто ‒ гармоньчо-влакын фестивальышт

Марий сем дене марий чон кана. Волжск олаште тыгай кумыл 12 июньышто поснак шижалте: «Мы – часть России» этнический тӱвыра фестиваль жапыште тыште  икымше гана Пеледыш пайрем эртен.

Родына-влак марий шӱлышан пайремым вученыт. Волжскысо Рӱдӧ площадьыште келыштарыме сцене гыч Марий Эл тӱвыран сулло, Татарстан гыч толшо артист-влак выступатленыт: Светлана Осипова, «Мурпеледыш»ансамбль да молат. Тыштак гармоньчо-влакын фестивальышт лийын. Тушко Волжский, Медведево, Советский, Звенигово районла, Татарстан кундем гыч музыканче да тӱмырзӧ-влак ушненыт: Олег Бакутов, Леонид Ермаков, Эльвира Петрова, Василий Логинов, Татарстан кундем Агрыз район гыч Владимир Кибатовын вуйлатыме «Йоҥгалт, гармонь йӱк» ансамбльын вич музыканчыже, самырык гармоньчо Сергей Савинов шке возымо мурыштым, такмак-влакым йоҥгалтареныт. Кажнылан Волжск оласе администрацийын Таумут кагазшым да пӧлекым кучыктымо. Марий тӱвыра рӱдерын «У муро» вокал студийжат муркостенеч дене миен.

«Марий кудо» шочмо калыкнан историйже дене кылдалтше книга, газет ден журнал-влаклан поян ыле. Верысе кидмастар Зинаида Александрован марий курчак ончерже марий ӱдырамашын вургемым ыштен моштымо мастарлыкшым почын.

Погынышо марий-влакым Волжск оласе тӱвыра пӧлкам вуйлатыше С.А.Герасимова саламлен, пайремым эртараш полшымылан Марий калык конгресслан, Марий Тӱвыра рӱдерлан тауштен, ончыкыжым Пеледыш пайремым ола воктенысе пӱртӱс аланыште эртараш кӱлмӧ нерген палемден. А Юлсер оласе марий-влак «Тидым шукертак да моткоч вучена» маньыч.

Палемден кодыман, пайремым эртараш марий предприниматель, Юлсер кундемыште «Надежда» аптек сетьым вуйлатыше Н.А.Кондратьева кугун полшен. Тудлан таум каласена, да куштылго огыл пашаштыже сай лектышым тыланена.

Раисия Николаева.

Авторын фотожо.