Кызытсе илышын йодмашыжым шотыш налын, пытартыш икмыняр ийыште ятыр у профессийым самырык еҥ-влак шымлат. Ялозанлык пашаштат тидын шотышто ончыко каят. Теве ушкал-шамычын тазалыкыштым эскерымылан поснак кугу тӱткыш ойыралтеш.
У Торъял районысо «Первый Май» озанлыкыште Андрей Кропотов узи специалистлан тырша. Профессийже нерген каласкалымыж годым вес семынже вольык-гинеколог улам, манеш. Самырык еҥ ушкалын тӱжаҥмыж гыч тӱҥалын презым ыштыме да тылеч варат пеҥгыдеммыже марте тазалыкшым эскера. Тидым узи аппарат-влак полшымо дене шукта.
Поварлан тунемын
Андрей ты кундемысе Элембай ялыште шочын-кушкын. Икымше профессионал шинчымашыжым Семёновка селасе 21-ше номеран училищыште налын. Тушто рвезе повар-кондитерлан, буфетчиклан тунемын. Тыгодымак Кропотов Йошкар-Оласе Олимпийский резерв училище пелен куштылго атлетике дене заниматлен.
Дипломым налмеке, Андрей Москошто шыл комбинатыште ик жап тыршен. Тыгак Марий кугыжаныш университетыште технологлан тунемын. Кеҥежым «Первый Май» озанлыкыште договор почеш пашам ыштен. Рвезын колхоз пашаште сайын тыршымыжым ужын, «Первый Май» озанлыкым вуйлатыше Аркадий Арсентьевич Новиков тыштак кодаш йодын. Тудлан вольыкым шукемдаш полшышо специалист лияш темленыт.
– Тыгай специализаций почеш пашам ыштыше еҥ-влак тӱкан шолдыра вольыклан УЗИ-м ыштат. Мемнан озанлыкыштына тидлан лӱмын аппарат уло. Тудын полшымо дене ушкал-шамычын презым ыштен кертмышт шотышто тазалыкыштым кӧргӧ могыр гыч ончем. Варажым ушкалын тӱжаҥмыж гыч презым ыштымешке эскерем. Тидын дене паша огеш мучашлалт. Презым ыштыме деч варат ушкалын тазалыкше пеҥгыдеммешке диагностикым эртарем. Тидыже вольык вес ганат презым сайын ыштен кертше манын ышталтеш, – каласкала Андрей Кропотов.
Икмыняр пашам вораҥдара
Самырык еҥ тыгак озанлыкыште ушкалым искусственно тӱжаҥдыше специалистын сомылжым (осеменатор) жаплан шукта.
– Озанлыкысе ферме-влак тӱрлӧ ялыште верланеныт. Садлан ик кечын ик фермыште, вес кечын вес фермыште пашам ыштем. Вольыклан уколым шындылам, ректальный исследованийым эртарем. Тылеч вара кузе да мом шымлыме шотышто данный-влакым компьютер документыш вераҥдем. Тидлан лӱмын программым келыштарыме. Тыге ушкалын тазалыкшым эскерымашым вӱдена, – палдара УЗИ-специалист.
Ушкалланат презым ыштыме деч вара йол ӱмбак шогалаш полшыман. Кызыт тидлан фермылаште чыла условий уло. Андрей вольыклан писынрак тӧрланаш полшымо пашамат шукта. Тидлан ушкал-влаклан массажым ышта, иктаж показаний уло гын, эмла.
Андрей Кропотов, УЗИ аппарат-влак дене пашам ышташ манын, Озаҥ олаште лӱмын курсым эртен. Ойлымыж почеш, чылалан вигак тунем шуын, уто нелылык дене тӱкнен огыл. Самырык еҥ «Первый Май» озанлыкыште ынде нылымше ий ты сомылым вораҥдара. Палдарымыж почеш, тӱҥ сомыллан УЗИ-м ыштымаш, ушкалым искусственно тӱжаҥдымаш да нуным эмлымаш шотлалтыт. Фермылашке кудалышташ Кропотовлан озанлыкыште лӱмын машинам налын пуэныт. Садлан тудо чыла пашам жапыште виктарен шукта.
Ялыште ила
Кропотов ешыж дене Элембай ялыште лакемын. Пелашыже Шернурысо эмлымверыште биолог-лаборантлан пашам ышта. Нуно кум икшывым ончен куштат. Йоча-шамыч У Торъял посёлкысо школышто тунемыт, йочасадыш коштыт. Вате-марий мӧҥгӧ гыч пашашке кажне кечын шым шагат эрдене лектын каят. Садлан еш каныш кечым поснак чот вуча. Тыге нуно чылан пырля погынат да жапым пайдалын эртараш тыршат. Вет мӧҥгыштат изирак озанлыкым кучат, пакчагӧргым шындат.
Андрейлан пашаже келша. Адакшым шочмо кундемыштак сай пашадарым ыштен налмат, чонжым куандара. Тыге ешым пукшаш, йӱкташ, чикташ оксам ыштен налаш манын, тора кундемыш кудалыштме гай огыл, палемда тудо.