Йошкар-Оласе администрацийыште эн чулым доброволец-влакым саламленыт. Тыгак «Идалыкын доброволецше – 2022» муниципал конкурсым иктешленыт. Конкурсыш 27 йодмаш пурен. Кажне участник шкеж нерген презентацийым да портфолиом ямдылен.
Волонтёр-влакын поро пашаш кумылын ушнымыштым республик кӱкшытыштӧ акленыт. Нуным чапле пӧлек да диплом дене палемденыт. Волонтёр-влак идалык мучко тӱрлӧ пашам виктареныт. Мутлан, 2021 ийысе переписьыште, «Формирование комфортной городской среды» федерал проектым илышыш шыҥдараш, патриот шӱлышан акций ден мероприятий-влакым эртараш чот полшеныт.
Тыге «Поро пашам организоватлыше» номинацийыште Анастасия Антакова, «Студент-влакын поро пашам шуктышо ушемышт» (вуз-влак коклаште) номинацийыште ПГТУ-н финанс да грамотность шотышто волонтёр рӱдерже, суз-влак коклаште ты номинацийыштак Торгово-технологический колледжын «Доброделы» волонтёр отрядше, «Доброволец ЗОЖ» номинацийыште волонтёр-медик-влак, «Добровольческая инициатива» номинацийыште Никита Торощин палемдалтыныт. А идалыкын доброволецше лӱмым Евгений Степанов сулен.