Шернур посёлкысо Н.А.Заболоцкий лӱмеш 2-шо №-ан школышто тунемше-влакым волонтёр пашалан изинек кумылаҥдат. Таче «От сердца к сердцу» волонтёр отрядыш чылаже 80 йоча коштеш. 11-ше классыште тунемше Полина Тойбахтина креатив паша шотышто волонтёр командым вуйлата. Таче тудын командыштыже – 11 икшыве.
Полина Шернур посёлкышто шочын-кушкын. Моткоч тыршыше, чолга ӱдыр. Изинек кидпашам ышташ йӧрата, моторлыкым «шочыкта». Тидыжак тудым волонтёр пашаш конден. Тудын вуйлатыме командыже тӱрлӧ пайремлан але посна кечылан, акцийлан открыткым ямдыла, еҥ-влакын кумылыштым нӧлта.
– 2020 ий годсек ты пашам шуктем. Эн ондак шкетын тыршенам гын, вара команде чумыралте. Тӱҥ шотышто 8-10-шо класслаште тунемше ӱдыр-рвезе-влак коштыт. Южгунамже изирак йоча-шамычат мемнан деке ушнат. Школыштына шинчымаш, тӱвыра, медиа, социальный да моло направлений дене команде-влак улыт. Кажныже шке пашажым шукта.
Меат ойыртемалтше улына. Креатив волонтёр-влаклан мом-гынат шонен лукман, командым погыман да пашалан пижман. Шарнем, посна акций почеш икымше гана илалше еҥ-влаклан кампетке дене пеледышым ыштенна ыле. А 8 июльышто Еш, йӧратымаш, ӱшанле улмо кечылан висвисым ямдыленна. Тунам посёлко рӱдыштӧ еҥ-влаклан ты пайремын кузе шочмыж нерген каласкаленна. Пытартыш жапыште СВО-што улшо салтак-влакын аваштлан пӧлек шотеш открыткым ыштенна. Шуктен толмо пашана дене соцкылысе сообществыште палдарена. Кидпашам ыштыме мастер-классымат эртарем, тидлан молымат туныктем. Тыгак школышто тӱрлӧ мероприятийым ямдылаш да эртараш полшем.
2021 ийыште мыланем волонтёр книгам пуэныт. Тачысе кече марте тушто 645 шагат погынен. Волонтёр паша дене кылдалтше школысо, районысо, российысе акцийлашке ушнем. Кок ий ончыч «Идалыкысе эн сай доброволец» районысо конкурсышто 2-шо верым налынам ыле, – мане П.Тойбахтина.
Ӱдырын тыршымыжым шуко грамотыжо, таумутшо пеҥгыдемдат.
Полина шере кочкыш, кампет-влак дене тӱрлӧ композицийым, пеледыш аршашым ышташ йӧрата. Тидым вес семынже эше свит-дизайн технике маныт. Тидлан ӱдыр шкеак тунемын. Аршаш пеш моторын лектеш, шинчам куандара, налше-влакат улыт. Яра жапше годым ӱдыр уремыште кошташ, поснак пӱртӱсышто каналташ, йӧрата. Тудлан шып да ласка верыште лияш келша.
Полина – шонымашке шуаш тыршыше, тале ӱдыр. А волонтёр паша тудым ончыко вӱда, сеҥымашыш конда. Тыгодым школышто сайын тунемеш. Тудо социально-гуманитарный классыште шинчымашым пога. Вашке ЕГЭ-м кучаш тӱҥалеш. Тудлан ямде, пешыже ом тургыжлане, мане. А могай профессийым налме шотышто але тичмаш рашемден огыл. Умбакыжат тыгаяк чолга кодаш, экзамен-влакым сайын кучаш да келшыше профессийым ойырен налаш тыланена.
П.Тойбахтинан альбомжо гыч налме фото-влак.