Морко район Смычка ялыште шочын-кушшо, МарГУ-што Калыкле тӱвыра да тӱвыра кокласе кыл институтышто 1-ше курсым тунем пытарыше Ирина Петрова йоча годсек волонтёр пашалан кумылан. МарГУ-што ты пашаш чолган ушна, тӱрлӧ мероприятийым эртараш полша. А 21-29 июльышто тудо Самара олаште эртыше «iВолга» форумышко миен коштын.
Поро паша куандара
Иринам еҥлан поро пашам ышташ йӧратымыже волонтёр лияш кумылаҥден. Пошкудо Волаксола ялысе школышто тунеммыж годым «Морко шӱшпык» волонтёр отрядыш коштын.
– Волонтёрын пашажым ончалаш гын, нимо нелыжат уке. Тыге коштын, лачак жапым гына пайдалын эртарет. Кызытсе саманыште шуко еҥын изи сомылымат яра ыштымыже огеш шу. А волонтёр – тиде шке кумылын полшаш тарваныше еҥ. Кажне вашлиймаш гыч ала-мом ум пален налам. Опытан еҥ-влак дене пырля пашам ыштен, пайдале ой-каҥашым вуйыш пыштем, – мане Ирина.
Икымше гана форумышто
Тудо «iВолга» форумыш миен коштмыж нергенат кумылын каласкалыш.
– Тыгай кугу мероприятийыш логалаш куштылго огыл. Йодмашым колташ манын, тестым решатлаш кӱлын. Марий Эл гыч тушко 77 чолга ӱдыр-рвезе логалынна. Кажныже шке проектше дене миен. Вич еҥын пашаже финалыш лектын, сай акым налын. Кок участник грант дене палемдалтын.
Форумышто проект пашалан поснак кугу тӱткышым ойырымо. Вет проектым возен, ме шке калыклан полшен кертына.
Форумышто «Мыйын калыкем» направленийым ойырен налынам. Тушто Юл кундем округысо калык-влакын илыш-йӱлашт дене палыме лийынам. Этношатёр выставкыште тӱрлӧ калыкын мастарлыкыштым шымлен лектынам. Форум келшен, – палдарыш И.Петрова.
Ӱдыр ече дене талын мунчалтен, писын куржталыштын.
8-ше классыште почеламут-влакым возаш тӱҥалын. Нуным «Морко мланде», «Ямде лий», «Кугарня» газетлашке колтеден.
– Почеламутым возымо шотышто ой-каҥашым туныктышем деч йодаш ала-молан вожылынам. Сандене самырык возкалыше Христина Александровалан эҥертенам. Тудо мыйын почеламутем-влакым сылнештараш да чын чоҥалтмыжым рашемдаш полшен. Варажым «Ямде лий» газетын чолга юнкоржо лийым. Поэзий аланыште Антонов Ивук лӱмеш премий дене палемдалтым, – ойлыш ӱдыр.
Программист олмеш – туныктышо
11-ше классыште тунеммыж годымак Ирина программист лияш шонен. Сандене школ деч вара тудо МарГУ-шко физико-математический факультетышке тунемаш пурен. Но поэзийлан шӱман, марий шӱлышан улмыжо вес корным ойырен налаш таратен. Университетыште ӱдыр тӱрлӧ мероприятийыш, лудмашыш, олимпиадыш, спорт таҥасымашыш ушна. Тыгак сылнымутан книгам кумылын лудеш.
И.Петрова шукерте огыл Марий Эл Радиошто вӱдышылан пашам ышташ тӱҥалын. Шкенжым диктор семын терга. Ӱдырлан ончыкыжымат тыгаяк чолга кодаш, волонтёр пашам талын шукташ да у кӱкшытыш шуаш тыланена.