Йошкар-Олаште элнан, оланан да посна еш-влакын историйыштым ончыктышо урем шагал огыл. Тидыже калык курымеш шарнаш тӱҥалже манын ышталтын.
1979 ийыште икмыняр совет войскам Афганистан Демократический Республикыш пуртымо. А тӱрыснек нуным 1989 ий февральыште гына лукмо. Афганистаныште служитлыше-влакым воин-интернационалист маныт. Нуным шарныме лӱмеш 1988 ийыште Йошкар-Олаште ик изи садым да уремым воин-интернационалист-влакын манме.
Уремлан лӱмым Калык-влакын всесоюзный переписьышт деч вара пуымо. 1989 ий 1 март годсек Красноармейский уремын Изи Какшан эҥер деч вес могыр ужашыже Воин-интернационалист-влак урем маналтеш. Тусо 25-ше номеран пӧртыштӧ Афганистаныште 1979-1989 ийлаште интернационал порысым шуктымо годым геройла колышо землякна-влакым шарныме лӱмеш мемориал оҥам пижыктыме.