Российысе Обороно министерствын пунчалжылан келшышын, тений 16 июнь гыч 11 июль марте военный учебный заведенийлаш икымше курсыш тунемаш пураш шонышо кандидат-влаклан профессиональный отбор да вступительный испытаний-влак регионлаште лийыт.
Пытартыш вич ий жапыште тыгай профессиональный отбор кок этап дене эртаралтеш.
– Икымше этап – 18-20 июньышто «Арена Марий Эл» куштылго атлетике комплексыште выездной комиссий кандидат-влакын физический ямдылалтмыштым терга.
– Кокымшо этап – 24-25 июньышто ПГТУ-што профессионально-психологически ямде улмыштым ончат.
Кӧм тунемаш налыт?
Кыдалаш образованиян Россий гражданиным (тудын тазалыкше шотышто чарак лийшаш огыл):
– военный службым эртыдыме 16-22 ияш рвезе;
– военный службым эртыше да призыв почеш служитлыше 24 ияш марте еҥ-влак;
– контракт почеш службым эртыше 30 ияш марте военнослужащий-шамыч.
Ийгот тений 1 август марте ончалтеш.
ЕГЭ-м ончат
Командный профилян военный вузлаш тунемаш пураш руш йылме, математике да обществознаний дене ЕГЭ результатым ончат.
Инженерный профилян военный вузыш тунемаш пураш шонышо еҥ руш йылме, математике да физике (але информатике) дене ЕГЭ-м сдатлышаш.
«Военно-политическая работа» специальностьлан тунемаш пураш – руш йылме, историй да обществознаний дене ЕГЭ результатым.
Военно-медицинский академийыш тунемаш пураш шонышо еҥын руш йылме, химий да биологий дене ЕГЭ результатым ончат.
Икмыняр военный вуз, мутлан, Военно-медицинский академий, Связь военный академий, Военный университет, ӱдыр-влакымат тунемаш налеш.
Могай льгото пуалтеш?
«Об образовании в Российской Федерации» закон дене келшышын, икмыняр категорий еҥлан, кӱшыл образованийым пуышо тунемме заведенийын студентше лиймеке, льгото пуалтеш.
– Вступительный испытанийым сайын эртымеке, военный вузлаш контракт почеш служитлыше да военный службышто коло ий деч утларак порысым шуктышо гражданинын йочажым эн ончыч налыт. Тыгак – ийгот шумо дене, тазалык дене кылдалтше але организационно-штатный мероприятий-влак амаллан кӧра военный службым кодышо (20 да утларак ий служитлымеке) еҥ-влакын йочаштлан.
– Специальный военный операцийыште улшо (лийше), тушто вуйым пыштыше але сусыргышо (сусыр, контузий), СВО-што (йотэлыште боевой действийлаште) военный службо годым черланыше еҥ-влакын йочаштым вступительный испытаний деч посна тунемаш налыт.
Россий Обороно министерствын военный вузлаштыже тунеммаш – тиде:
– оксам тӱлыде, сай кӱшыл шинчымашым налаш, илыме верлан, кочмылан, вургемлан да медицине обеспеченийлан тӱлыман огыл;
– кажне тылзын 15-26 тӱжем теҥгем тӱлат;
– идалыклан кок гана (телым 15 сутка да кеҥежым 30 сутка) отпуск.
Военный вузым тунем пытарымеке, офицерлан кугыжаныш могырым тыгай полыш пуалтеш:
– профессиональный могырым да паша верыште кугу кӱкшытыш шумаш;
– шкаланже да ешыжлан социальный аралтыш;
– кугу оксам тӱлат;
– служебный илыме вер, а икымше контрактым подписатлымеке, шке илыме верым налаш йӧн ышталтеш;
– медполышлан да санаторно-курортный эмлалтмылан оксам тӱлыман огыл;
– идалыкыште 60 суткаш отпуск пуалтеш;
–20 ий служитлымеке (военный вузышто тунемме жапат тышкак пура), сулен налме канышыш лекташ лиеш.
Лекше йодышым 8(8362) 45-03-98 номеран телефон дене але РФ Обороно министерствын военный учебный заведенийлашкыже тунемаш пурымо шотышто 111 номер дене «шокшо линийыш» йыҥгыртен, тыгак илыме вер почеш военный комиссариатыш миен рашемдаш лиеш.
РФ Обороно министерствын сайтше гыч налме фото.