Пытартыш жапыште Иван Валеевын мурыжо-влак Российысе икмыняр радиошто йоҥгат, ятыр телеканал клипше-влакым ончыкта. Иванын ик телеканалысе интервьюж годым «Мый марий улам» манмыже шуко еҥым ӧрыктарыш. Кушеч тиде рвезе? Молан але марте тудын лӱмжым нигӧколын огыл?
– Мый Марий Элысе Волжск олаште шочынам, Советский район Роҥго селаште кушкынам. Кызыт тушто ачам, авам, шольым ден шӱжарем илат. Тысе школышто 7-ше класс марте тунемынам, вара Тверь оласе Суворовский училищыш тунемаш пуренам. «Кадетство» сериалым ончымем дене военный профессийлан шӱмаҥынам, очыни. Адакшым тунам ала-мом уым пален налме шуын. Такшым гын ешыштына военный нигӧуке, – каласкалыш Иван.
Тверь оласе Суворовский училищыште шинчымашым налмеке, Иван кум ий Воронеж оласе Н.Е.Жуковский ден Ю.А.Гагарин лӱмеш военно-воздушный академийыште тунемын. Но кенета тудо военный профессийым кодаш шонен пышта да муро аланышке кусна. Тидын шотышто Ваня шкеже тыгерак каласыш:
– Чылажат – чон йодмо почеш. Тунам шке кумылем ом шукто гын, вес гана ала ӧкынем ыле… Кызыт илышыште шке корнем муынам, шонем. Военныйлан тунеммем шотыштат ом чамане. Суворовский училище жапыште мый СТС каналын «Самый умный» проектыштыже участвоватленам, йоча лагерьлаште лиеденам. Икманаш, моткоч шуко сай шарнымаш кодын. Тунамак гитарым шокташ тӱҥалынам. Чыла тидыже музык тӱняшке ошкылмо корнем лийын. Военный академийыште тунемме жапыште сценыш лекташ тӱҥалынам, мурым шкеак возенам. Тидын деч посна ок лий ыле.
Иван Валеев калык ончыко профессиональный артист семын «Новелла» мурыж дене лектын. Мурызын ойлымыж почеш, тений 23-шо февральыште ты мурын ик ияш лӱмгечыжым палемдаш лиеш: лач ты кечын ӱмаште Иван «Новеллам» интернетеш вераҥден. Кӱчык жапыште муро колыштшо-влакын чоныштым савырен. Мурылан войзымо клип ятыр жап «МузТВ» каналын чартыштыжат ончыл верыште ыле.
– Литературышто новелла – могай гынат кӱчык историй. Мурем арам огыл лач тыге лӱмдалтын: тушто – мыйын илышыште лийше ик кас. Мутат уке, чылажат ӱдыр дене кылдалтын. Тиде мурышто нимогай уто мут уке. Кажне корнышто – могай-гынат шонымаш, – каласыш шке мурыж нерген Иван.
«Новелла» калыклан тынар чот келшен шинчеш манын, тудо шоненат огыл. Но лач ты муро артистлан профессионал музык тӱняшке корным почын. Тылеч вара икмыняр тылзе гыч мурызо Валеевым тӱрлӧолашке концерт дене ӱжаш тӱҥалыныт. А рвезе тудын творчествыжым йӧратыше-влакым у мурыжо-влак дене куандарен. Тыге «Пьяная», «Аромат», «Парадокс», «Тот самый» да тулеч моло муро-влак шочыныт. Кодшо шыжым Иван Валеевын икымше муро альбомжо лектын.
Кызыт Иван кушто да мом ышта? Тиде йодышлан артист тыге вашештыш:
– Кызыт йӧратыме таҥем дене пырля Ульяновск олаште илем. У альбомым ямдылем, клип-влакым войзаш шонем, тӱрлӧолаште концертым ончыктынем. Илен-толын, Москвашке илаш куснаш шонена. Яра жап улмо годым мӧҥгышкӧ, ача-авам деке миен толмо шуэш ыле. Тыгак май тылзыште Йошкар-Олаште концертым ышташ шонем. Ӱшанем: чылажат шонымо семынак лиеш.
Иван Валеев мурызо семын ик ий наре веле пашам ышта гынат, тудын творчествыже тӱжем дене еҥын кумылжым савырен. Ютубышто, мутлан, мурызын икымше клипшым ныл миллион наре еҥ ончен. Рвезе ятыр олаште зал тич калыкым пога. Артист дене мутланыме деч ончыч чыла тиде ӧрмаш гай чучо, но кызыт умылем: Иван – талантан музыкант веле огыл, тыгак моткоч поро кумылан, тыматле койышан рвезе. Тидыже кеч-кӧланат чонеш возеш. Тудлан ончыкыжымат усталык пашаштыже сай лектышым тыланена.