Марий Элым Вуйлатыше Юрий Зайцев Луганск Калык Республикыш миен коштын. Тушто Марий Эл гыч военнослужащий-влак дене мутланен.
Луганск олаште Юрий Зайцев Луганск Калык Республикын жаплан вуйлатыше Леонид Пасечник дене вашлийын. Нуно икте-весе коклаште тӱрлӧ шӧрын дене кылым ыштыме шотышто каҥашеныт. Регионлан поро кумылын полышым пуымо, тӱвыра аланыштат пырля ыштыме шотышто кутыреныт.
Юрий Зайцев ты кундемысе Луганск, Лисачанск, Кременная, Северодонецк, Новодружеск ден Рубежное олалашке миен.
Марий Элым Вуйлатыше ден Республикысе Правительстве Председательын алмаштышыже Степан Воронцов Марий Элысе военнослужащий-влак дене вашлийыныт. Частьыште боец-влак дене мутланеныт, дислокаций верым, илыме условийым ончен лектыныт. Военнослужащий-влакын мутышт почеш, икмыняр кече ончыч гуманитар грузын пытартыш партийжым налыныт. Нуно квадрокоптер, дрон-влак ваштареш пычал ден тепловизор-влакым пуымылан таум ойленыт. Бойышто нуно поснак кӱлыт маныныт.
Специальный военный операцийыште улшо участник-влак аваштлан, пелашыштлан, йочаштлан да землякыштлан марла, рушла да татарла саламым ойленыт.