Теле толмо дене Марий Элыште корно туткар шукырак лиеда. Тидын нерген палемденыт Марий Элысе МВД-н Госавтоинспекций управленийыштыже эртарыме пресс-конференцийыштат.
Тений 1-16 декабрьыште гына республикыште ДТП 40 процентлан шукемын – 40 корно туткарым регистрироватлыме (ӱмашсе тыгаяк жапыште – 26 ДТП). А ДТП-ште колышо-шамыч вич пачаш шукемыныт: 1-16 декабрьыште 11 еҥ колен (ӱмаште тыгаяк жапыште – 2 еҥ). Тушто 51 еҥ сусырген (ӱмаште – 35 еҥ), нунын коклаште – ийготыш шудымо куд ӱдыр-рвезе. Утларак шуко аварий – Медведево, Шернур районлаште да Волжск олаште.
Тыгодым кажне кудымшо корно туткар поран але тале лум годым лийын. Тыгай игечыште водитель-влаклан поснак тӱткӧ лийман. Йолешке-шамычланат шекланыман, корно правилым пудыртыман огыл: пычкемыште машина кудалме корнышто ошкылман огыл, волгалтше элемент денат водитель-шамычлан шке нерген шижтарыман. Декабрьын кок арняштыже корно туткарыште колышо 11 еҥ кокла гыч ныл еҥже – лач йолешке.
Аварий шукеммылан кӧра Госавтоинспекций пашаеҥ-шамыч олалаште да районлаштат рейд ден тергымашым, патрульный наряд-влакым шукырак эртарат. Тыгодым йолешке-влакым тӱкен кайыме шотышто профилактикылан, йоча-влакым кондыштарыме годым правилым шуктымылан, йӱшывуя машинам виктарыме нерген пален налмылан утларак тӱткышым ыштат. А декабрь мучаш гыч пайрем каныш гутлаште Марий Элыште «Йӱшӧ водитель» оперативно-профилактический мероприятий эртаралтеш.
Авторын фотожо.