Тений корно лӱдыкшыдымылык шотышто законодательствыш икмыняр вашталтышым пуртымо. Нунын нерген Марий Элысе МВД-н корно лӱдыкшыдымылык шотышто кугыжаныш инспекцийын управленийжым вуйлатыше Ю.С.Есипов палдара.
Автошкол-влаклан
Тений 1 март гыч транспортым виктараш правам налаш экзаменым сдатлыме годым кугыжаныш автоинспекций ден автошкол-влак кокласе кылым кучымо радамым пеҥгыдемдыме. Ончычсо семынак кугыжаныш автоинспекцийыште правам налаш шонышо кандидат-влак коклаште транспортым виктараш тылеч ончыч права деч посна кодшо-шамычым, кандидат-влакын медсправкыштым тергат, тыгак кӱлеш йодмашым ямдылат да колтат. Тылеч ончыч автошкол-влак водитель радамыш пураш шонышо кандидат-влак спискым кугыжаныш автоинспекцийыш нунын тунем пытарымышт деч 30 кече ончыч колтеныт. У радамлан келшышын, тыгай спискым автошколышто вождений тӱҥалме деч 10 паша кече ончыч колтен шуктыман.
Ончычсо семынак автошкол-влакын йодмашыштлан эҥертен, кугыжаныш автоинспекцийын подразделенийже-влак экзаменым эртарыме графикым ямдылат да пеҥгыдемдат. Автошкол-влак кугыжаныш автоинспекцийыш палемдыме кече деч 3 кече ончыч экзаменым эртараш группо-влак спискым колтышаш улыт. У приказ тыгак автоинспекций подразделений да автошкол пашаеҥ-шамычын паша радамыштым рашемда.
У штраф
«О внесении изменений в Кодекс Российской Федерации об административных правонарушениях» федеральный законын посна положенийже-влакат илышыш пурталтыныт. Транспортный средстван корнышто кудалышт кертмыжым пеҥгыдемдыше диагностический картым оформитлыме огыл гын, водительлан 2 тӱжем теҥге штрафым тӱлаш перна. Но, Российын административный правам пудыртымо кодексшылан келшышын, икымше гана тиде правам пудыртымеке, 24 шагат жапыште водитель кок да утларак гана тыгай административный правам пудыртымылан логалын гын, тудлан штрафым уэш тӱлыман огыл.
Кум ийлан шуят
Машинам виктараш удостоверенийын срокшо тений але 2023 ийыште лекшаш гын, тудым эше кум ийлан шуят. Тиде пунчал 12 апрель гыч вийым налын. Тидыже тыглай еҥ-влаклан да шке бизнесым почшо-влаклан административный нагрузко деч утлаш полшышаш. Тыгай удостоверений-влакын срокышт автоматически шуйна.
Тахограф огеш кӱл
РФ Правительствын 2022 ий 31 мартысе пунчалжылан келшышын, ола кӧргыштӧ пассажир-влакым шупшыктышо М2 ден М3 категориян транспортный средстваште тахографым шындаш кӱлмым 2024 ий 1 март марте чарыме.
Пассажир-влакым ик ола гыч вес олаш, тыгак ола деч ӧрдыж кумдыкышто шупшыктышо М2 да М3 (5 т марте нелытан транспортный средстве, тушто 8 да утларак пассажирлан шинчаш вер уло) категориян транспортный средствалаште ончычсо семынак тахограф лийшаш.
Техосмотрым эртыме годым ола кӧргыштӧ пассажирым шупшыктышо транспортын маршрут картыжым да путевой листшым (тудым перевозчик оформитлышаш) ончыктат гын, тахографым огыт терге. Маршрут карте да путевой лист уке гын, тергымаш тичмашнек эртаралтеш.