2024 ий тӱҥалтыште, ӱмашсе тыгаяк жап дене таҥастарымаште, Марий Элыште корно туткар шукемын. Тидын нерген Марий Элысе МВД-н ГИБДД управленийыште эртаралтше пресс-конференцийыште ойленыт.
25 мартлан данный дене келшышын, республикыште 107 корно туткарым (ӱмашсе деч 16,3%-лан шукырак) регистрироватлыме. Тушто 19 еҥ колен, 139 еҥ сусырген. ДТП-ште сусыргышо ийготыш шудымо-влакат 50%-лан ешаралтыныт. Тыгайже Волжск олаште, тыгак Волжский, Шернур да Советский районлаште шукырак улыт.
Автомашина-влак вашла керылтме ДТП-шамыч эн чӱчкыдын лийыт – 58 (+32%) тыгай туткар, тушто 11 еҥ колен да 88 еҥ сусырген.
Йолешке-влаклан кӧра лийше корно туткар шагал огыл – 29 (-6,5%), тушто 6 еҥ колен да 24 еҥ сусырген.
ДТП амалым рашемдаш гын, водитель-шамычын утыждене писын кудалыштмыштым палемдыман. Икте-весылан корным пуымо правилымат чӱчкыдын пудыртат. Тыгак ваштареш кудал толшо транспортын полосашкыже лекме, йолешке-влакын корно правилым пудыртымо, йолешкын корным вончымо верым кудал эртыме годым правилым пудыртымо, светофорысо сигналын йодмыжым шуктыдымо случай-влакат шагал огытыл.
Тений январь-февральыште ола да моло населённый пунктлаштат корно туткар шукемын. 47 тыгай ДТП-ште ныл еҥ колен, 54 еҥ сусырген.
Федеральный корнышто ДТП 67%-лан шукемын: 15 корно туткарыште 4 еҥ колен, 26 еҥ сусырген. Регионысо да муниципальный автокорнышто лийше 17 туткарыште 6 еҥ колен да 24 еҥ сусырген.
16 ияш марте ӱдыр-рвезе-шамыч дене кылдалтше кок тылзе жапыште лийше 11 корно туткарым регистрироватлыме, 17 еҥ сусырген. 11 случай гыч кандашыштыже йолешке йоча лийын. А икшывым машина тӱкымӧ годым кажне кокымшо туткар йочан тӱткыдымылыкшылан кӧра лийын.
Йолешкым тӱкымылан кӧра 19 ДТП-ште кок еҥ колен, 18 еҥ сусырген. Палемдыман, кажне кумшо тыгай ДТП пычкемыште лийын.
Шым ДТП-лан амалым йӱшӧ водитель-влак ыштеныт. Каласен кодыман, еҥ-шамычын йӱшӧ водитель-влак нерген увертарымышт почеш коло наре еҥым кучымо.
Тачысе кечылан Марий Элыште ПДД-м пудыртымым эскерыше 190 фотовидеофиксаций комплексым вераҥдыме, нунын кокла гыч 170 – стационарный, молыжо – мобильный. Тений февральыште, мутлан, утыждене писын кудалмылан водитель-влаклан 41,3 тӱжем пунчалым колтымо. А мартыште – 51,2 тӱжем тыгай пунчалым, тушеч 1800-жым – чот писын кудалмылан.
Игече левешта, лум шула, тидлан кӧра корно правилым пудыртымо случай-шамыч шукемыт. Садлан, водитель-влак, тӱткӧ лийза, ида вашке!
Авторын фотожо.