СЕҤЫМАШЛАН – 80 ИЙ🎗
«Выходила на берег Катюша, на высокий берег на крутой» мурын мутшым Михаил Исаковский возен, а семым Матвей Блантер келыштарен. Тиде муро кажне салтакын шӱмышкыжӧ логалеш. Мурышто фронт гыч йӧратыме качыжым вучышо ӱдырын шижмашыж нерген ойлалтеш.
Ик версий почеш, героиньын прообразше – Владивостокышто шочын-кушшо Екатерина Алексеева. Тудо офицер-пограничник пелашыж дене пырля 1938 ийыште Хасан ер воктене японец-влак ваштареш кредалмаште лийын да геройлыкшылан Йошкар Шӱдыр орденым сулен.
2013 ийыште, подвигшым ӱмыраҥдаш манын, Владивосток олаште Моргородок скверыште «Катюша» чапкӱм шогалтеныт. Скульптурын авторжовлак К.Новиков ден И.Кулаков лийыныт.