10 сентябрьыште Марий Элым вуйлатыше А.Евстифеев вияш эфирым эртарен. Тушто теве мо нерген ойлалтын да тылеч вара илышыш могай вашталтыш-влак пурышаш улыт:
— 1 сентябрь гыч республикысе пожарный-влаклан пашадарым тылзыште 5000 теҥгелан кугемдаш. Тыгак 2022 ийыште эше 3 тӱжем теҥгелан ешарыме шотышто йодыш ончалтеш.
— Йошкар-Олан мэржылан рӱдолаште частный секторысо кумдыкым уэмдыме шотышто программым ышташ.
— Бюджетник-влакын окладышт 1 сентябрь гыч 5 процентлан ешаралтеш. Тылеч посна ФАП пашаеҥ ден ветеринар врач-влаклан 5000 теҥгем ик гана пуат.
— «Единый Россий» фракцийын темлымыж почеш Марий Эл Республикын Кугыжаныш Погынжо шуко шочшан еш-влак шотышто законопроектым ямдылышаш. Закон илышыш пурталтеш гын, еш шке ойырен кертеш: 250 тӱжем теҥгем але мландым яра налаш.
— «Единый Россий» фракцийлан Йочам ешыш налме ешын кечыжым ыштыме нерген законопроектым ямдылаш кӱштымӧ.
А.Евстифеевлан тӱрлӧ проблеме шотышто арня жапыште еҥ-влак 600 утла йодышым возен колтеныт. «Вияш эфирыште» йоҥгалт шуктыдымо йодыш-влакым министерстве ден ведомствылашке колтымо.