Москваште «Единый Россий» партийын ХХ съездше эртен. Тушто Марий Эл вуйлатыше А.Евстифеев лийын. Погынымаш деч вара тудо иктешлыме шот дене шке шонымашыжым ойлен:
– Пленарный заседанийыште выступатлымыж годым Россий президент Владимир Владимирович Путин партийын ыштышаш шуко пашаж нерген ойлен. Эн ончыч социальный илышым саемдаш палемдыме: йочан еш-влаклан полшаш, туныктымо, тазалыкым аралыме йодыш дене утларак тыршаш. Россий Федерацийысе субъект-влакым кредитоватлыме шотышто посна программе темлалтеш. Корным чоҥымо, тӱшка калыкым шупшыктымо транспортым уэмдыме да моло пашаштат ятыр сай ошкылым ыштыман. Коронавирус дене черланыше-влакын тазалыкыштым пеҥгыдемдаш программе ышталтеш. Элым вуйлатышына чыла тыгай тӱҥ пашам шуктымаште «Единый Российын» еҥже-влак уло вийын тыршышаш улыт манын палемден.
Эртыше съездыште Кугыжаныш Думыш сайлымашке депутатлан кандидат-влакым пеҥгыдемденыт. Марий Эл деч спискыште икымшылан республикым вуйлатыше А.Евстифеев шога. Тудын почеш Е.Кузьмин, Л.Бендер, Э.Александров улыт.
Кугыжаныш Погын председательын алмаштышыже, В.М.Васильев лӱмеш МарНИИЯЛИ-н директоржо Е.Кузьмин:
– Калыкын илышыжым саемдаш партийын еҥже-влак чылажымат ыштышаш улыт манын палемдыме съездыште. Тидлан шуко посна программым ямдылыме. Элыштына илыше кажне еҥын эрласе кечылан ӱшанже лийшаш, тудо кугыжаныш велым социальный полыш улмым шижшаш. Партийын федеральный спискыжым вуйлаташ пеш лӱмлӧ да пагалыме еҥ-влакым ойырымо. Тугеже чыла шонымо илышыш шыҥдаралташ тӱҥалеш манын, пеҥгыдын каласен кертына. А ме тыршаш ямде улына.
Э.Иманаев.
Снимкыште: А.Евстифеев съездыште Марий Эл деч делегат-влак Е.Кузьмин, А.Гречихо, О.Фокина дене пырля.