Висвис пеледыш – моткоч пайдале кушкыл.
Шӱм чогашылым пеҥгыдемдаш, артериальный давленийым нормыш кондаш, пӧръеҥ да ӱдырамаш либидом кугемдаш висвис чайым эре йӱман.
Иммунитетым пеҥгыдемдаш да коваште тӱсым саемдаш манын, кечеш ик стакан висвис чайым йӱмӧ сита.
Утыждене кочкын шындымеке, висвис чайым йӱаш пайдале. Тыгак тудо организм гыч этиловый спиртым луктеш, аппетитым саемда.
Организм гыч уто вӱдым да шинчалым луктеш. Тидлан кӧра тудым варикоз да йол пуалме дене орланыше еҥ-влаклан йӱаш темлат.
Шӱлымӧ орган чер годым 30 г висвис, 25 г писте пеледыш, 25 г пӱртньык, 25 г кугырӱдывондо (бузина) пеледыш кӱлыт. Ик кугу совла шудо вартыш ӱмбак ик стакан шокшо вӱдым темыман. Изиш шинчыктымеке шӱрыман. Шокшо лемым кечеш 2-3 стакан дене йӱман.
Гастрит да энтерит годым 10 г висвис пеледышым, 10 г пӱчмышудым (тысячелистник), 10 г арымшудым, 10 г пӱртньыкым, 10 г шалфейым иктеш лугыза. Кок изи совла шудо вартыш ӱмбак ик стакан шокшо вӱдым темыза да пел шагат шинчыктыза. Шӱрымӧ лемым пел стакан дене кечеш кок гана кочмо деч пел шагат ончыч йӱза.
Лыпланаш манын, 2 изи совла висвис пеледышым, 1,5 изи совла лаванде пеледышым, 1 изи совла кугырӱдывондо пеледышым, 1/8 изи совла йоҥыштымо гвоздикым иктеш варыза. Ныл изи совла шудо вартыш ӱмбак кок стакан шокшо вӱдым темыза, вич минут шинчыктыза.
Пагар чер дене орланеда гын, 1 изи совла висвисым, 2 изи совла вӱршудым, 2 изи совла пӱртньыкым, 1 изи совла пийвӧчыжым (толокнянка), ик изи совла шалфейым иктеш лугыза. Ик кугу совла шудо вартыш ӱмбак ик стакан шокшо вӱдым темыза, 15-20 минут шинчыктыза.