Курыкмарий район Виловат селасе тӱвыра пӧрт ончылно улшо фонтан тышке толшо кажне еҥын шинчашкыже вигак перна. Тудо ты районышто эн кӱкшӧ вер тыште улмо нерген ойла. Фонтаным тӱрлӧ ужар кушкыл ден пеледыш-влак сылнештарат. Фонтан деч шола велне, уремлан келшыше, корабльым ушештарыше сценым ыштыме. Ты корабльлан лӱмынак ал парусым ургымо. Туштыжо Курыкмарий районысо выпускник-влаклан «Алые паруса» кугу мероприятий 2015 ий годсек эртаралтеш. Тудо кажне ийын ты районысо ятыр самырык ӱдыр-рвезым чумыра. Тыгайже Марий Элыште лач тыште веле лиеш.
Илыш дене тӧр ошкылшо
Виловат селасе тӱвыра пӧрт кызытсе жаплан келыштаралтше, илыш дене тӧр ошкылшо манын, пеҥгыдын каласаш лиеш. Тушко пурымеке, тидыже вигак шижалтеш. Залым да пӧлемым олмыктымо годым японский, африканский, дворцовый стиль-влаклан эҥертыме. Клубыш толшо-шамычлан тӱрлӧ тематикан фотозоно уло. Тыште тыглай каналташ, дискотекым эртараш, концертым ончыкташ чыла шотыштат йӧн уло. Тӱвыра пӧртым 2010 ий годсек Валентина Михайловна Кубекова вуйлата. Клубын илышыж нерген тудын дене мутланышна.
– Тышке толмем почеш дискотеке-влакым пеш сайын эртаренна. Тудын кӱшеш шагал огыл шийвундым ыштенна. Ты окса дене тӱвыра пӧртым олмыктымо пашалан пижынна. Тыгак тӱрлӧ проектыш ушнаш тыршена. Тыге 2019 ийыште «Культур» нацпроект да «Культурная среда» регионысо проект почеш, тӱвыра пӧртын леведышыжым тӱрыснек вашталтенна. Тыгак сценым волгалтарыше, йÿкым келыштарыше аппаратурым наледенна. Нуныжо зритель-влакын йодмашыштлан келыштаралтше улыт. Кызытат тӱвыра пӧртнам волгалтарыме да тудым тӱзатыме шотышто паша-влак шукталтыт. Тоштыжым вашталташ, ачалаш лийшыжым тӧрлаш тыршена, – каласкалыш Валентина Михайловна.
Кажне гана тӱрлӧ семын
Тыште мероприятий-влак чӱчкыдын лиедат. Клуб пашаеҥ-влак кажне ийын ик сынан концертым але пайремым огыт эртаре. Валентина Михайловнан палдарымыж почеш, тематике эреак вашталтеш. Но тыгодым тудо калыклан пайдам ыштен кертше, уш-акылым пудыратыше, историйым ушештарыше лиеш.
Теве, мутлан, тений апрельыште «Поёт село родное» мероприятий негызеш ковышта нерген кугу да йоҥгыдо пайремым эртареныт. Тидлан лӱмын сценарийым келыштареныт. Историй дене кылдалтше калык модмашым, фольклорым кучылтыныт. Вет ты кундемыште ятыр еш шке озанлыкыштыже ковыштам кушта. Тыге XIX курым гыч тӱҥалын тачысе кече марте ты пакчасаскам куштымо шотышто легендылан, тӱрлӧ исторический фактлан эҥертен, шкешотан, оҥай концертым ямдыленыт.
Виловат селаште Курыкмарий районысо «Мыры», «Палдран пазар», «Курымешлан тый денет Россий» да моло кугу мероприятий-влак эртаралтыт. Тушко ты районысо моло тӱвыра пӧрт-влакат эреак ушнат.
Пел курымаш юбилей
Виловат селасе тӱвыра пӧртын «Мыралтена, кушталтена» мурышо да куштышо ансамбльлан тений 50 ий темеш. Тушто хормейстерлан Любовь Зиновьевна Соснова ятыр ий тыршен. Тыгак Российысе да Марий Элысе тӱвыран сулло пашаеҥже, композитор Александр Яковлевич Сосновын надыржым палемдыман. Тудо ансамбльым да Виловат кундемын тӱвыражым чапландарымаште шуко пашам ыштен.
50 ий жапыште ансамбльыште ятыр участник выступатлен. Коча-кован пашаштым икшывышт, уныкашт шуят. Ты ансамбль Российысе усталык конкурслаштат ик гана веле огыл мастарлыкшым терген. Ятыр гана лауреат лӱм дене палемдалтын. Ансамбльын репертуарыштыже калык фольклорлан кугу тӱткышым ойырат. Верысе композитор-влакын чыла гаяк мурыштым мурат. Нунын дене республикысе тӱрлӧ мероприятийыште выступатлат.
Ты ансамбльын ик участникше Олег Степанович Ванюков каласкалыш (ӱлыл снимкыште — пурла гыч икымше)
– Ансамбльыште 15 участник улына. Ончычшо тушто шукын муреныт. Ныл хорлан шелалтын выступатленыт. Тыге, мутлан, икымше хорышто туныктышо-влак, кокымшышто чыве фабрикыште тыршыше-шамыч, кумшышто озанлык пашаеҥ, нылымшыште медицине аланыште ыштыше-влак лийыныт.
Кызыт Пеледыш айо пайремлан ямдылалтына. Туштат ме хор дене мурена. Такшым ты ансамбльыште мыйын ачам ден авам, туныктышем-влакат муреныт. Нуно мастарлыкышт дене Моском, Санкт-Петербургым да моло олам ӧрыктареныт. Ансамбль мураш да кушташ йӧратыше-влакым чумырен, тушто профессионал-влак лийын огытыл. Туге гынат участник-влак дене профессионал мурызо, композитор, концертмейстер-влак пашам ыштеныт. Ансамбльна Виловат кундемым, Курыкмарий районым да Марий Элым эреак чапландарен. Тидыжым ятыр тауштымаш, чапкагаз ден диплом-влак пеҥгыдемдат.
Тылеч посна Виловат тӱвыра пӧртыштӧ «Чайничело», «Настроение» ансамбль-влак улыт. Тыгак Виловат тӱвыра пӧрт пелен Шӹндӹрйӓл, Паратмар, Тышнал тӱвыра пӧрт-влак пашам ыштат. Ты кундемыште тӱвыра илыш шолеш. Верысе калыклан жапым пайдалын да веселан эртараш йӧн уло, тӱҥжӧ – кумыл лийже. А кумылым тыште нӧлтен моштат!
Виловат селасе тӱвыра пӧртын архивше гыч налме да Н.Лаврентьеван фотошт.