Марий Элыште 31 октябрь гыч 30 ноябрь марте «Виден – значит, жив!» акций эрта.
Регионышто идалык тӱҥалтыш гыч йолешке-влакым 150 гана машина дене тӱкеныт. Тышеч 25 еҥже колен. Звенигово, Курыкмарий, Шернур, Параньга районлаште, Йошкар-Олаште да Волжск олаште тыгай случай-влак шукемыныт. Кодшо ийысе дене таҥастарымаште, ДТП чот кугемын огыл, но колышо еҥ-влак шукемыныт.
Тӱҥ шотышто корно туткар-влак кастене да йӱдым лиедат. Тыгак йолешке-влакын вургемыштышт тулым волгалтарыше палышт уке.
Корно туткар шагалемже манын, Кугыжаныш автоинспекций пашаеҥ-шамыч, волонтёр, мер пашаеҥ-влак дене пырля профилактический мутланымашым эртарат. Кугорно воктене верланыше предприятий-влаклан поснак кугу тӱкыш ойыралтеш. Тыгак йоча-влак дене вашлиймашым эртарат. Мутлан, Волжск олаште икшыве да ача-ава-влак дене мутланымеке, светоотражающий элемент-влакым кучыктат.
Шарныза! Автомобиль «дальний» тул дене кудалеш гын, йолешкым да тулым волгалтарыше палыжым 100-350 метр тора гыч ужеш. «Ближний» тул дене кудалме годым 25-30 метр гыч коеш. Тыгодым тулым волгалтарыше пале уло гын, айдеме 150-200 метр тора гыч коеш.