15-20 октябрьыште Калуга областьыште #МолодёжкаОНФ-ын «Рубеж-2021» форумжым иктешлыме.
Тушко 67 кундем гыч 18-35 ияш 100 ӱдыр-рвезе миен. Нуным стратегически виктарыме сомылым шукташ, чот неле ситуацийыште лидер лияш, командыште пашам ышташ туныктеныт. Участник-влак радамыште Марий Эл гыч Денис Смирнов лийын.
Форумын тунемме программыже вич йыжыҥ гыч шоген: спикер-влак дене вашлиймаш, мастер-класс-влак, командым ышташ полшышо тренинг-влак, иктаж-мом шочыктышо чолгалык, тулото воктене спикер-влак дене мутланымаш («галстук деч посна» формат).
Пытартыш кече участник-влаклан чынжымак ятыр вийым, мастарлыкым йодын. Нунылан куд шагаташ таҥасымаш эртаралтын. Вийым, писылыкым, чытымашым, командыште пашам ыштен моштымашым, тыглай огыл условийыште да неле ситуацийыште йӧным да шотым мумашым тергеныт. Ӱдыр-рвезе-влак чарак полоса гоч эртеныт, байдарке дене ийын вонченыт, чодыраште кочкаш шолтеныт, йолташыштлан икымше полышым пуэныт.