Йошкар-Олаште илыше Васильевмыт ешыште вич икшыве кушкеш: кум эрге, кок ӱдыр. Кеч-могай ӱдырамашлан вич ньога деч «ава» манмым колаш – кугу пиал.
Спортлан шӱман, тыматле койышан кушкыт
Морко район Тыгыде Морко ялыште шочшо (ача-ава деч посна кодмеке, ты районысо Зеленогорский посёлкышто кушшо) Пётр ден Кужэҥер район Руш Шой села гыч Анастасия 2009 ийыште ешым чумыреныт.
Чаманен каласыман, шуко шочшан ешым тений кугу ойго авалтен. 27 июльышто еш озан, йӧратыме ачан да пелашын ӱмыржӧ спецоперацийыште кӱрылтын. Анастасия вич икшыве дене шкет кодын. Кызыт тӱҥ эҥертышыже шке кокаже ден изаже-влак да пелашыжым ончен куштышо ача ден авалийшыже улыт.
– Кугурак эргыланна – 15 ий. Костя 9-ше классыште тунемеш, спорт дене пеҥгыде кылым куча, бокс дене заниматла. Кокымшо эргына – Мирон, 2015 ийыште шочын. Тудо 4-ше классыште шинчымашым пога. Изаж семынак спортлан шӱмаҥ кушкеш. Футбол да баскетбол кружоклаште мастарлыкшым тапта. Тыгак шахмат дене сайын модеш, тӱрлӧ таҥасымашыште вийжым терга. Серёжа – кумшо икшыве. Тудат чолга да чулым рвезе, футболыш коштеш. Тений 1-ше классыш каен. Ныл ий ончыч кок йыгыр ӱдырна Лина ден Элина ош тӱняш толмышт дене ешнам пойдареныт. Пётр тидлан чот йывыртен ыле. Кум эрге деч вара эше ик гана ава лиймем нерген пален налмеке, ӱдыр-шамычымак вучен. Тыгак лийын. Тыге пелашем дене вич шочшан ача-ава лийынна, – палдара кугу ешыж дене Анастасия Васильева.
Аван ойлымыж почеш, икшыве-шамыч койыш-шоктышышт дене чылт ачашт гай улыт. Поснак Костя кугурак эргышт Пётр гаяк шонымашке шуаш тыршыше, цельым шынден моштышо кушкеш. Тыгодым нуно моткоч ласка улыт, тидым пошкудо-шамычат шекланен шуктеныт, манеш Анастасия.
Жапым пырля эртарат
Еш кугемме дене Васильевмыт ик пӧлеман пачерым кум пӧлеманлан вашталтеныт. Ола воктене дачым налыныт.
– Пелашем дачыште лияш моткоч йӧратен. Чыла сомылым тушто шкеак вораҥдарен. Кид-йолжо чыла пашалан толын. Шуко вийжым дачышкына пыштен. Каныш кечылаште икшыве-влак дене пӱртӱсыш, чодыраш чӱчкыдын лектынна. Мыланна чылан пырля у вер-влакым шымлаш келшен. Нине татым тачат чоныштем аралем да шинчавӱд йӧре шарналтем. Тыгак чылан погынен, иктаж-могай сай кином ончаш йӧратенна. Тидыже ешнан ик эн сай йӱлажлан шотлалтеш. Тачат тыге ыштена, тольык ачана деч посна, – шарналта шуко шочшан ава.
Шке кумылын каен
Пётр Васильев СВО-ш шке кумылын каен. Тидлан Россий Обороно министерстве дене контрактым пеҥгыдемден. Ешыже тидын нерген подписатлыме кечын веле пален налын.
– Такшым тудо икмыняр гана мутым луктын ыле. Но тунам мый кугу ешна улмо, икшыве-влакым йолӱмбаке шогалташ кӱлмӧ нерген умылтаренам. А тидым ача ден ава пырля шуктышаш улыт, ойленам. Садлан тушко каен кертеш манын, шоналтенат кертын омыл. Вет Пётр йоча-шамычым ончаш эреак полшен, тӱҥ эҥертышем лийын. Мыйым да икшыве-шамычым йӧратымыжымат эреак шижынна, – манеш Анастасия.
П.Васильев 2025 ий 12 мартыште СВО-што порысшым шукташ тӱҥалын. Кеҥежым Донецк мландысе сӧй пасушто вуйым пыштен. Взводын командирже лийын. Шке пашажым ответственно шуктен.
Анастасия Васильеван чон сусыржым вич икшывыже тӱрлӧ лектышышт дене тӧрлат. Йоча-шамыч чылан гаяк спортышто пеҥгыдемыт, тӱрлӧ таҥасымашыште вийыштым тергат да сеҥыше-влак радамыш лектыт. Икшыве куана – ава пырля куана. Йоча тургыжлана, ава шӱм шӱдӧ пачаш коржеш. Еш – тиде икте-весым пагалымаш, йӧратымаш да умылымаш, манеш шуко шочшан ава. Тудо тыгак палемда: тыгай шижмаш дене кажне еҥ илышаш, тунам еш пеҥгыде лиеш. Ме тудын ойжо дене келшена. Тек кажне еш пиалан лиеш!
Еш альбом гыч налме фото.