2026 ий 1 январь гыч индивидуальный пенсий коэффициентым (ИПК) шотлымо годым йочам 1,5 ияшыж марте ончымо жап страховой стажыш пурталтеш. Аван але ачан (иктыжын) коэффициентышкыже гына.
Тидлан кӧра 1 декабрь гыч Россий Социальный фондын (СФР) Марий Эл Республикысе пӧлкаже страховой пенсийым уэш шотлаш манын, вич да утларак икшыван пенсионер-ава-влак деч йодмашым налеш.
Идалыкат пеле марте йочам ончымым 2026 ий марте ныл шочшо марте ончен куштышо-влакын гына страховой стажышкышт пуртымо. Кызыт ты чаракым кораҥдыме. У правил почеш пенсийым шотлымо годым визымше, кудымшо да тылеч вара шочшо йоча дене шинчыме пагытымат ешарат. Нунылан ынде ава стажым веле огыл, пенсий коэффициентымат налшаш.
Ӱдырамаш икшывыж дене идалыкат пеле деч шагал огыл шинча гын, икымше йочажлан 2,7 коэффициентым шотлат, кокымшылан – 3,4, кумшылан да тылеч варасылан – 8,1 ИПК дене.
У правил вес ийын пенсийыш лекшылан гына огыл ышталтын, тыгак кызыт пенсийым налше-влакланат. Марий Элыште тыгай перерасчётлан 3 492 ӱдырамашын праваже уло.
Йодмашым СФР-ын Марий Элысе пӧлкаштыже але Госуслуго портал гыч пуаш лиеш. Декабрьыште ыштен шуктеда гын, кугурак пенсийым январь гыч налаш тӱҥалыда.
freepik сайт гыч налме фото.