СВО-н Марий Элысе ветеранже-шамыч кундемысе путешественник-влакын клубышт дене пырля Озаҥ олашке экскурсий дене миен коштыныт.
Тушко Инвалид-влаклан Всероссийский обществын Марий Элысе пӧлкажын илышыш шыҥдарыме «Доступный туризм» социальный программыж почеш каеныт.
Марий Элын тӱҥ внештатный психологшо Елена Кузнецова герой-влакын путешествоватлымыштым кӱлешаналан шотла. Программе почеш, нуным культурно-исторический объект-влак дене палдарат, духовно вияҥаш да уш-акылым пойдараш полшат.
Психолог тыгак ветеран-шамычын путешественник-влакын клубыштын эртарыме тӱрлӧ мероприятийышке ушнымышт тыныс илышыште социально-психологический адаптацийым эрташ сай полышым ыштымым палемда. Мутлан, у верыш лекме годым айдеме тӱрлӧ уда шонымаш деч кораҥеш, у вер нерген пален налаш кумылаҥеш. Тыгак ик шонымашан еҥ-шамыч дене вашлийын кутырымаш социальный кылым пеҥгыдемда. Тыгодым у йолташым муаш йӧн ышталтеш. Йырым-йырысе кумдыкым шымлымаш вуйушым вес семын пашам ышташ тарата.
Икманаш, путешествоватлымаш, экскурсийыш коштмаш, пӱртӱсыштӧ канымаш тазалыкым пеҥгыдемдаш, кумылым нӧлташ, вияҥаш сайын полшат.
Марий Элысе «Защитники Отечества» фондын ВК-се тӱшкаж гыч налме фото.