13 декабрьыште Сеҥымашын XXX идалыкше лӱмеш тӱвыра полатыште «Весела сем» фольклор ансамбль юбилейжым чапле концерт дене палемден. Ты мероприятий пагалыме уна ден ончышо-влакым поген. Программыштым тыгак «Каче-влак» группо ден Марий Эл Республикын сулло артистше Анатолий Зарецкий пойдареныт. Ты мероприятийым ансамбльын участникше Вячеслав Комаров вӱден.
– Ме шке программынам ятыр тошто да у муро, такмак-влак, тӱрлӧ кундемысе куштымаш, семӱзгарым шоктымаш дене пойдаренна. Тыгак мый да эше икмыняр артистна шке гыч мурым возат, нунымат сценыште мурен ончыктенна. Мутлан, мый ты концертыште у муремым «Илыш вий – эх илышет» семӱзгар шоктымо почеш йоҥгалтаренам, – ойла ансамбльым вуйлатыше Майя Александровна.
«Весела сем» ансамбль 2013 ий мартыште шочын. Самырык-влакын полатыштыт верланеныт. Тудым тӱҥалтыш гычак Майя Александровна Малинина вуйлата. Ончыч коллектив кум-ныл еҥ гыч шоген, жап эртымек тудо кушкын.
Уста артист-влак тӱрлӧ кундемыште шке мастарлыкыштым ончыктеныт, калыкым куандареныт.
Кызыт «Весела сем» ансамбль Сеҥымашын XXX идалыкше лӱмеш тӱвыра полатыште верлана. Ты коллектив 17 еҥ гыч шога: латик ӱдырамаш да куд пӧръеҥ. Эн самырык участник 50 ияш, илалшырак – 75 ияш. Чыланат тӱрлӧ районла гыч улыт: Кужэҥер, У Торъял, Морко, Волжск, Медведево, Шернур, Советский, Киров вел да Йошкар-Ола.
– Мемнан участникна тӱрлӧ сомылым ыштен шогат: кӧ эмлыме верыште тырша, кӧ чоҥымаште, кӧ йочасадыште, кӧ кевытыште, шукынжо сулен налме канышыште улыт. Туге гынат кушташ-мураш уло кумылын коштыт. Пелашемат Вениамин Малинин ансамбльыш пырля коштеш. 8 ий ончыч оҥайлан тӱҥалын да кызытсе кече марте куанен коштеш. Шке коклаштына ме тыге манына: «Ме «Весела сем» улына. Весела сем почеш куштена!» – ойла М.Малинина.
10 ий ынде «Весела сем» шке калыкшым куандара. Ончыкыжымат лӱмжӧ йоҥгалаш тӱҥалеш манын ӱшанен кодына.
Дарья Быкова.
Интернет гыч налме фото-влак.