Марий Элым Вуйлатыше Ю.Зайцев Куба, Вьетнам, Беларусь, Турций, Казахстан, Венесуэла да Армений гыч толшо журналист-влак дене вашлийын мутланен. Нуно Марий кундемыш пресс-тур почеш толыныт.
Тудо 9-12 августышто эртаралтын да Йошкар-Олан 440 ияш лӱмгечыжлан да Регион-влак кокласе «Йошка Еш» II гастрономический фестивальлан пӧлеклалтын.
Юрий Зайцев журналист-влаклан Марий Эл, экономикыште, тӱвыраште да туризмыште тӱнямбал кыл улмо шотыштат каласкален.
Мутланымаш годым Марий Элым Вуйлатыше Марий кундемым йӧратен шындымыж да туддене кажне кечын утыр кугешнымыж нерген ойлен.
Юрий Зайцевын палемдымыж почеш, республикышкына уло эл да лишыл йотэлла гыч уна-влак толедат. Экскурсант-шамычлан пӱртӱс, рӱдолан архитектуржо, Шереметев замок келшат.
2023 ийыште Марий Элыш 1 млн ула турист толын коштын.
Тений Козьмодемьянскыште причалым почмо. Тудо идалыкыште 300 пассажирский ден круизный судным вашлийын кертеш. Тыгак Йошкар-Олаште аэропортын у пассажирский терминалже чоҥалтеш.
Унам ончымо сфере писын вияҥеш. Тӱвыра сферысе сеҥымашлам Российыште веле огыл, вес эллаштат палат. Марий Элысе тӱвыра тӧнеж-влак Беларусь, Казахстан, Таджикистан да Китай дене кылым кучат.
Юрий Зайцев республикын производстве ден ялозанлык сферылаште кугу потенциалже уло манын. 2023 ийыште Марий Эл 61 эл дене торгово-экономический вашкыл почеш пашам ыштен.
Уна-шамыч тыгай вашмутланымашлан тауштеныт. А тылеч ончыч журналист-влак Йошкар-Олам ончен савырненыт, Юриныш, Морко район Унчо селаш, Козьмодемьянск олаш миен толыныт, марий калыкын тӱвыраж да йӱлаж дене палыме лийыныт.
Эльвира Терентьева.
Марий Элым Вуйлатышын пресс-службыжын фотожо.