Эрдене Галина молгунамсе семынак изи ӱдыржым да пелашыжым шупшалын да пашашке каен. Тудо вич кечылан вес олашке кудалын. Ты жапыште изи Катя эре аважым йодын. Ачаже ӱдырым тӱрлӧ семын лыпландараш тыршен.
Вич кече эртымеке, изи ӱдыр, школ гыч толмеке, ача-аважын пӧлемыштышт аважым вучен шинчылтын. Кенета аважын ныжыл йӱкшым колын, пуйто тудыжо ӱдыржым шӱден. Йӱк ӱдырын пӧлемже гыч шоктен. Катя, шке, пӧлемышкыже пурымеке, кроватьыште шинчыше ӱдырамашым ужын. Тудыжо мотор халатым чиен да ӱпшым кӱшкӧ поген. Галинан тыгай вургемже лийын огыл, ӱпымат тыге ик ганат поген огыл. Ӱдырамашын изи ӱдыр деке савырнымекыже, Катя шеҥгеке лӱдын чакнен. Тудын аваже вич кече жапыште 10-15 ийлан пуйто шоҥгемын: шӱргыжӧ пуалше, саҥгаштыже – келге куптыр-влак…
– Тол мый декем, ӧндалам шокшын-шокшын, – пелештен «вес ава». Ты жапыште Катя эшеат чот лӱдын, но сравоч йӱкеш лӱдмыжӧ мондалтын. Ӱдырын ачаж ден аваже мӧҥгӧ толыныт улмаш. Ача омсалондем гычак кычкырен: – Катя, ават толын». Ты жапыште ӱдыр шке пӧлемжым уэш ончалын, но нигӧм ужын огыл. Пачерыште мо лийме нерген ӱдыр ачаж ден аважлан ойлен. Нуныжо омыштет ужынат дыр веле маныныт. Катя дене тыгай случай-влак аважын шуко жап мӧҥгыштӧ уке улмыж годым лиеденыт.
Тылеч вара шым ий эртен. Катя кушкын, илышыжат вашталтын, наркотик дене таҥлалтын. Тудым пуйто эре ала-кӧ тидым ышташ ӱжын. Катям ачаж ден аваже пеле колышым тӱрлӧ вер гыч чӱчкыдын мӧҥгӧ конденыт. Тыгодым ӱдыр «вес аван» сынжым кажне гана ужын, тудыжо Катям, кидше гыч кучен, тӱрлӧ вере шӱдырен.
Ик кечын Катя эмлымверыште шинчажым почын. Тудын уло капше корштен, вуйыштыжо мо ышталтмым умылашат неле лийын. Такшым ӧрыктарышыже нимоат лийын огыл: молгунамсе семынак ача ден ава ушым йомдарыше ӱдырыштым адак ала-кушеч конденыт. Ты гана Катян аваже, ӱдырлан изи улмыж годым «вес аван» молан кончымыжым каласкалаш шонен пыштен.
Галинан Вика йыгыр шӱжарже (чылт Галина гаяк чуриян, тӱрлӧ аярым шупшмыжлан кӧра шоҥгыракын койын) лийын. Тудо шала илышым илен. Шке жапыштыже Галина тудлан чот полшен, кажне гана йыгыр шӱжаржым тӱрлӧ туткар гыч утарен, эмлымверыштат реабилитацийым ятыр гана тудын кӱшеш эртен. Вика передозировко дене колен. Тунам Галина, шӱжаржым сайын поген пышташ манын, вич кечылан мӧҥгыж гыч каен. Ты жапыште Вика изи Катя деке «толын». Тыге тудо Галиналан ӱдыржӧ гоч ӱчым шуктынеже улмаш. Катя деке Вика чӱчкыдын «толын», кажне гана тудын почеш каяш йодын. Тидланак кӧра Катя шкенжым наркотик дене аяраш кумылаҥын.
Тидым колмеке, Катя умылен, вет тудо, чынжымак, аваже эре воктене манын шонен да «вес ава» почеш каен. Ты историй тудым чот лӱдыктен. Тылеч вара ӱдыр эмлымверыште ятыр жап эмлалтын. Тушечын лекмеке, аважын шочмо олашкыже да Викан шӱгар ӱмбакше каен. Тушто Вика деч прощенийым йодын да тудым, почешыже шупшаш огыл манын, чот сӧрвален.
Таня Т.
Йошкар-Ола.