Марий Элым Вуйлатыше Ю.Зайцевын кӱштымыж почеш Козьмодемьянск ола покшелне социальный обслуживатлымаш да калыклан паша верым ситарыше организаций-влаклан верым ойырымо. Тидлан Комсомольский уремыште ондак поликлинике лийме пӧлем-влакым ойыраш пунчалме.
Республикысе паша да калыкым социально аралыме министр М.Островскаян увертарымыж почеш, Козьмодемьянскыште министерствын вич тӧнежше уло. Нуно социальный ден кугыжаныш услуго-влакым 20 тӱжем утла еҥлан пуат. Тыгодым социальный обслуживаний организаций-влакын зданийышт санитарный, противопожарный законодательстве дене шотлан огыт тол, тыгак маломобильный еҥ-влаклан пурен лекташ йӧн уке.
Кугыжаныш услугым саемдаш, передовой технологий почеш пашам ышташ ондакысе поликлиникын яра шогышо зданийышкыже вераҥдаш пунчалме.
1 148,3 кв. метр кумдыкым капитально олмыктат, мебель ден оборудованийым налыт, ешартыш функционалан кабинет-влакым йӧнештарат.
Фото: Д.Речкин/ Марий Элым Вуйлатышын пресс-службыжо.