Тений идалык тӱҥалтыште Козьмодемьянск олаште илыше курыкмарий блогер Любовь Ткаченко ден «Ермак» кафем кучышо Роман Ермаков «ВЕНЯ и ГАЛЯ» каналым почыныт.
Ик тылзе жапыште тушто 2300 подписчикым погеныт. Кажне видеом кокла шот дене 5-7 тӱжем еҥ ончен, южгунам 10 тӱжем наре мартеат шуын.
Айста воштылына!
Калыклан мыскара келша. Эше кодшо ийын нуно коктын икмыняр видеом соцкылыште луктыныт улмаш. Еҥ-влак уло кумылын комментарийым, отзывым да сообщений-влакым возеныт да ончыкыжымат тендан деч оҥай видеом вучаш тӱҥалына маныныт. Мыскарашт посна видео проектыш кушкын шуэш манын шоненат огытыл. Тыге «ВКонтакте» соцкылыште «ВЕНЯ и ГАЛЯ» сообществышт шочын.
Артист койышан Любовь ден Роман калыклан куаным кондаш тыршат. Тӱрлӧ образым шонен луктыт да икте-весышт дене курыкмарла мутланат. Южгунам уда ситуацийышкат логалыт (илышыште кажныжын лиеш). Видеолан кузе ямдылалтмыштымат калыклан ончыктат.
– Ме тыглай йолташ улына. Такшым когыньнанат чолгалыкна «йолгыжеш». Илышна тӱрлӧ событийлан поян. Кажныжын шке йӧратыме пашаже уло. Тудлан моткоч шуко жапым ойырена. А «Веня и Галя» проект – мемнан йӧратыме «шочшына». Калыклан куаным пӧлеклена да кумылыштым нӧлтена, тыгодымак тудлан кӧра ме шкеннам у могыр гыч тергена. Тиде, кузе ойлат, «комфорт зоно гыч лекмаш» манмет.
Ты сомыллан жапым кычалына, палемдена, сценарийым возена, нимом ончыде, съёмкышко каена. А вара монтажым кужун ыштыме жап тӱҥалеш. Но чылажат тиде арам огыл, ме калык дене вашкылым шижына, таумутым колына – тидыжак мемнам ончыкыжым тыршаш кумылаҥда, – лудына каналыште.
Веня ден Галя – Л.Ткаченко ден Р.Ермаковын шонен лукмо геройышт. Тыгай образ кенета толын лектын. Да тыгак кенета нуно кугу усталык корно дене ошкылаш таратеныт. Каласыман: тыште талант ден мастарлык деч посна нигузе.
Каналын вес постыштыжо лудына:
– Эн оҥайже кадр шеҥгелне кодеш. Южгунам ме, мӱшкырым кучен, керш налмеш воштылына. Но видеошто тидым ончыкташ огына тырше.
Тыгак «За кадром» манмымат интернетыш луктынна ыле. Икана сниматлаш кудалынна, а тылеч ончыч кевытыш тельняшкылан пуренна, тудлан оксам тӱленна, а налашыже монденна…
Южгунамже вуйышко шонымаш вучыдымын толын пура да тудым шукташ посна верыш кудалына. Когыньнанат паша графикна пеш шыгыр, сандене ала-кузе жапым муашак тӧчена.
Блогер лияш – тиде шкем койдарен кертмаш, калык коштмо верыште сниматлен моштымаш, оҥайын да шотлан толдымашын кояш ӧрман огыл, хейтлан (туманлымашлан) ямде лийман, ятыр жапым съёмкылан да монтажлан ойырыман. Ончышо-влак деч рушла кусараш кӱлеш мо манын рашемденыт. Кызыт нине мыскара видеолаште титр дене рушла возымаш кая. Лач энтузиазм кумыл дене, сайлан ӱшанен, пашам ыштыман.
Чынак, артист кумылан еҥ-влак, нимо уке гыч, ала-мом шонен муыт да соцкылышкышт лукташ оҥай контентым ыштылыт. А вара кажне лайклан, комментарийлан, репостлан, арален кодымылан йочала куанат.
Эшеже: илыш дене тӧр каят. Курыкмарий-шамычлан шкеныштын образышт дене стикер-пакетым (20 стикерым) ямдыленыт. Тудым «скачать» ыштен, иктаж-кӧлан сообщенийым возымо олмеш лач нуным колташ йӧн уло.
Тыгак ИИ деч Веня ден Галям курыкмарий куштымашыште «илаҥдаш» йодыныт. Оҥайын лектын.
Блогер веле огыл…
Курыкмарий драмтеатрыште Любовь Ткаченко пиар-менеджерлан кумшо ий пашам ышта. Кызыт театрын кум лаштыкшым вӱден шога. Тыгак тушто шындыме спектакльыште шкем актрисе семынат терген ончен. Тылеч посна Люба цифровой психолог, нумеролог да видеограф пашам шукта.
Тудо блогер семын 13 ий утла тырша. Теве соцкылысе ик лаштыкшым «Козьмодемьянск: прелести жизни в провинции» манын лӱмден. Мый ӱшанем: тудын тыршымыжлан кӧрат ятыр еҥ тиде олам Российыште пален налын.
Козьмодемьянскыште шочшо ӱдыр Йошкар-Оласе музыкальный училищыште (кызыт тудо И.С.Палантай лӱмеш тӱвыра да сымыктыш колледжын академический факультетше) «Хорын дирижёржо» специальность дене тунем лектын.
2000 ийыште Любовь Москошко илаш куснен. Тушто 18 ий илен. Пытартыш жапыштыже иллюстратор семын пашам ыштен, заказ-влак почеш сӱретлен.
2019 ийыште шочмо вершӧрышкыжӧ пӧртылын. Шарнеда, курыкмарий стикер-влак лектыныт ыле. Сӧрал ӱдыр ден качын иктаж 35 утла фотосӱретышт. Тудым лачак Люба сӱретлен.
Шукерте огыл Л.Ткаченко Т.Евсеев лӱмеш Национальный тоштерын пашаеҥже Надежда Васканован вуйлатымыж почеш «Программа всестороннего развития ребенка «Марийский – детям!» проектыштыже «Марий азбукым» ыштымаште иллюстраторлан тыршен.
– Тиде пашам шукташ куштылго лийын огыл. Но марий тӱвырам вияҥдымашке да шочмо йылмым (олыкмарий да курыкмарий) арален кодымашке шке надырем пыштымемлан моткоч куанем. Тунам 100 утла иллюстрацийым ямдыленам.
2023 ийыште Москошто Йошкар площадьыште Национальный литератур фестивальыште курыкмарий стикер-влак нерген каласкаленам, нуным ончыктылынам, – манеш мастар еҥ.
Курыкмарий рвезе
Роман Курыкмарий район Пычанал (Алёшкино) ялыште шочын-кушкын. Тудо курыкмарий йылмым сайын пала, сандене партнёр-актрисыжлан видеом войзымо деч ончыч курыкмарий шомак-влакым ойлаш туныкта. Вет Любан аваже курыкмарий, ачаже руш, но йылмым тунемын огыл.
27 ияш Роман Ермаков мӧҥгысӧ кочкышым ямдылыме кафем 2021 ийыште почын. Тиде ийынак кочкышым Козьмодемьянск ола ден Курыкмарий район мучко кондыштараш тӱҥалыныт. Тушто пиццым, роллым, салатым да моло кочкышымат ямдылат.
Такшым самырык рвезе Чебоксарысе Транспортный да строительный технологий техникумышто тунемын. Монолит ден каркас пӧртым чоҥымаште пашам ыштен. Чоныштыжо предприниматель лияш кумыл эре лийын. Сандене пелашыже дене коктын ты пашам ворандараш тӱҥалыныт.
Роман изиж годсек мыскарам да тӱрлыжым фантазироватлаш йӧрата. Но нигушто ондак выступатлен огыл. Санденак актёр семын модын ончаш келшен.
ВК-се «Веня и Галя» канал гыч фото да видео гыч скрин.