Морко район Йошкарэҥер ялыште илыше Венера Григорьева шке лӱмжӧ нерген тыге каласкала:
– Венера Милосская лӱмеш тиде лӱмым мыланем ачам пуэн. Венера Милосская, але Милос отро гыч Афродита – тӱнямбалне кумдан палыме статуй – нерген статьям газетыште лудын да, шочмекем, тыгай лӱмым возыктен.
Лӱмем келша, йочам годым ялыштына мый дечем кугурак эше ик Венера ыле. Венера «venus» латин мут гыч «йӧратымаш», «моторлык», «сылнылык» манын кусаралтеш. «Venero» мут («сӧрастараш») денат кылдат. Кече системыште ик планетымат тыге лӱмденыт. Татар ӱдырамаш-влак коклаште шукын Венера лӱман улыт, садлан тудо татар лӱм манын шонат, но тиде чын огыл.
Венера лӱман ӱдыр-ӱдырамаш-влак еҥ-шамыч дене кылым вашке муын моштышо, эре чыным гына ойлышо, кумылым савырыше, сӧрасымашке шуаш тыршыше улмышт дене ойыртемалтыт. Нуно моторын мутланат, нӧлталтше кумылан улыт. Венера – сай озавате, суртыштыжо арулыкым да чаткалыкым йӧрата. Венера Григорьева – лач тыгай.
Еш альбом гыч налме фото.