4-10 ноябрьыште Узбекистаныште спорт туризмын йолын коштмо да велосипед дене кудалыштмаште тӱнямбал кӱкшытан чемпионат ден первенстве эртаралтыныт. Тушто лу эл гыч 150 утла участник вийжым терген.
Российын сборный командыштыже Марий Элын спортсменже-шамычат лийыныт.
Личный первенствыште йолын коштмо дистанцийыште землякна Екатерина Николаева шӧртньӧ медальым сулен. Пӧръеҥ-влак коклаште Рустам Урдяков личный первенствыште да тыгак эстафетыште ший медальым сеҥен.
Велосипед дене кудалыштмашын фигурный вожденийыштыже Владимир Казанцев икымше вер дене палемдалтын. Тыгаяк таҥасымашын эстафетыштыже Владимир ден Алия Ибрагимова кокымшо лийыныт.
Марий Элын спортсменже-шамыч эше ятыр тӱрлӧ дисциплиныште ойыртемалтыныт. Элнан сборный командыжлан сеҥымашым лишемдаш полшымаште надырышт моткоч кугу.
Марий Элысе Спорт да туризм министерствын сайтше гыч налме фото.