Пелашем дене ӱдыр ден эргым ончен куштенна, кӱшыл шинчымашым пуэнна. Ӱдырем вузышто туныктышылан тунем лектын, эргым военный корнышко шогалын. Коктынат ешан, икшыван улыт. Эргым, руш ӱдырым марлан налмеке, кугу олашке служитлаш каен. А ӱдырем шотышто изиш нелылык лектын. Тудо пошкудо ял гыч ик рвезе дене келшен. Могай еш гыч улмыжым, ача-аважым ме сайын паленна. Рвезе йӱын коштшо, кредалше лийын. Ӱдырем тудым чот йӧратен. Койышыж деч лӱдын огыл. Мемнан мутнам колыштде, тудлан садак марлан лекте. Ме тудын ончыкылыкшо верч тургыжланена.
Веҥына дене кылна саемын огыл. Вероникам мемнан деч йӧршеш йӱкшыктарен, ача-ава деке тудо шуэн кошташ тӱҥалын. Вара веҥым вес ватым муын. Южгунам мӧҥгыжӧ кастене толын огыл. Аракам чот йӱын. Южгунамже Вероника какаргыше шинчан, кыралтше коштын. Но мыланна чыным нигунам луктын каласен огыл. Пуреҥгаенам, чот пералтынам манме шомак дене чыным шылтен. Кыралт илаш огыл манын, Василий деч кораҥдаш тӧченна. Ойырлаш каяш шӱденна. Ик жап мемнан дене илен ончен. Варажым марийже ватыжым сӧрвален уэш наҥаен. Тыге икмыняр гана лийын. Вероника пелашыж деч тӱрыс кораҥ кертын огыл.
Веҥым дене тачат ом келше, эре туманлем. А ӱдырем шотышто ме, ача-ава, сайым гына шонена, марийже деч йӧршеш ойырла манын ӱшанена. Вет Василий дене тудо орланен гына илаш тӱҥалеш, сайжым садак огеш уж.
Виктор.
У Торъял район.