26 майыште Москосо ВДНХ-ште «Россий» тӱнямбал выставке-форумышто Марий Эл Республикын кечыже годым Пеледыш пайрем эртаралтын.
Пайрем таҥ ошкылмаш дене тӱҥалын. Марий тувырым чиен, 500 наре еҥ «Каменный цветок» фонтан деч паркын тӱҥ сценыж деке ошкылыныт. Марий Эл гыч усталык коллектив, ансамбль да оркестр-влак концерт программым сӧрастареныт.
Ты кечын республикнан стендше воктене «Весела кумыл», «Морко кундем», «Шыжарвлӓ», «Юл сем» коллектив-влак уна-шамычым куандареныт. Толшо-влак мастер-классыш кумылын ушненыт – нуным марий тӱрым тӱрлаш, кӱслем шокташ, модышым ышташ туныктеныт.
Марий Эл Республикысе Тӱвыра, печать да калык-влакын пашашт шотышто министерствын архивше гыч налме фото.