Те мотор ӱдыр-каче улыда, мужыраҥаш шонеда, загсыш йодмашымат пуэн шуктенда. Ик кечын тыланда йыҥгыртат да Москошто ВДНХ-ште сӱаным модын ончыкташ темлат. Тыгай годым «огына» манаш йылме савырна мо?! Ангелина Пуртова ден Игнат Федотоват тореш лийын огытыл – 16 майыште Москошто нуно возалтыныт.
Ангелина Медведево район Цибикнур селаште вич шочшан ешыште шочын-кушкын, Игнат – Шойбулак села гыч. Школ деч вара ӱдыр Йошкар-Оласе Торгово-технологический колледжын студентше лийын, повар-кондитер специальностьым ойырен налын. Рвезе Марий радиомеханический техникумышто автомеханиклан тунемын.
– Игнат дене соцкыл гоч палыме лийынна. Мыйын фотографиемлан лайкым шынден, тылеч вара мый тудлан возен колтенам. Икымше вашлиймашна йӧршеш вучыдымын эртен. Игнат дене шоколадлан ӱчашенна (моланжым ынде ом шарне). Тудо сеҥалтын да мыланем пӧлекем кучыкташ Шойбулак гыч кастене йолын толын. Тылеч вара кажне кечын ваш возкаленна, вара ӱдыр-каче семын келшаш тӱҥалынна. Пырля улмылан вашке вич ий лиеш. Игнат – пеҥгыде койыш-шоктышан, шке мутшылан оза. Шонымашкыже шуаш чыла ышташ тырша. Тудлан кеч-кунам эҥертен кертам, – ойла Ангелина.
Тений февральыште ӱдыр-каче мужыраҥаш шонен пыштеныт, загсыш йодмашым Госуслуги портал гоч пуэныт. Такшым гын Игнат Ангелиналан пелашыже лияш эше 2021 ийыштак темлен. Тидын нерген Ангелина теве мом каласыш:
– Тиде йӧршеш вучыдымо лийын, вет ме ты темылан пешыже кутыренат огынал. Тудо кечын йолташ ӱдырем дене уремыште кошташ кутырен келшенна. Уремыш лектынам, а тушто йӧратыме еҥем шога, кидыштыже – кугу пеледыш аршаш.
Шукерте огыл рвезе СВО гыч шочмо верышкыже толын. Теҥгече Ангелина ден Игнат официально вате-марий лийыныт. А 24 майыште самырык еш Марий Элыште родо-тукымышт да йолташышт дене пырля пайремым ышташ шона.
– Коктынат тургыжланенна – кажне кечын огыл Москошто возалташ темлат. Но чылажат пеш сайын эртен, тиде кече ӱмырешлан шарналт кодеш, – ойла кок йӧратыше еҥ.
Палемден кодыман, ӱдыр ден качылан возалтме кечылан лӱмын мотор марий вургемым М.Шкетан лӱмеш Марий национальный драмтеатрыште ургеныт.
А.Пуртован альбомжо гыч налме фото.