8 ноябрьыште поро кумылан айдемым, йолташ ӱдыремын пелашыжым, ефрейтор Максим Владимирович Семеновым, пытартыш корныш ужатышна. Тудын шӱмжӧ 29 октябрьыште Донецк Калык Республикысе Сладкое посёлкышто кырымым чарнен. М.Семеновым, колымекыже, Патырлык орден дене палемденыт.
Шке тӱняумылымашем да шарнымашлан эҥертен, тыланда чон шортын возем.
30 октябрь. Рушарня. Эрдене помыжалтмеке, вигак кидыш телефоным нальым. Ончем, Алина (мурызо А.Макарова) йолташ ӱдырем деч йӱкан серыш толын: «Веронь, йыҥгырте». Йӱкшӧ мыланем ыш келше…
Йыҥгыртем, телефон вес могырышто автоответчик «Абонент сетьыште уке» манеш. Ик мессенджерыште серышым возышым. Тунамак ВКонтакте соцсетьыште Алинан, пелашыжын лаштыкыштым тергышым. Шукерте огыл сетьыште лийыныт. «Уф, Юмылан тау!» – шоналтышым да, телефоным пыштен, тӱрлӧ сомылкам ышташ кайышым.
Жап шукат ыш эрте, Алина деч вашмут тольо: «Сеть кучен огыл, корнышто лийынам». Серышым налмеке, вигак йыҥгыртышым.
«Привет! Кузе илыштат?» – малдале Алина.
Но мый вашеш вес йодышым пуышым: «Мо лийын? Чыла сай?»
Трукышто йолташ ӱдыремын йӱкшӧ вашталте да шортын пелештыш: «Максимем колен…»
Мо? Кузе? Кунам? Вуйышто могай гына йодыш ок пӧрд, но ик мутымат ойлен ом керт. Ик тат гыч веле шомак лекте.
Вара Алина мо лиймым кӱчыкын каласкалыш:
…
ТИЧМАШ ТЕКСТЫМ 11 НОЯБРЬЫШТЕ ЛЕКШЕ НОМЕРЫШТЕ ЛУДСА. ГАЗЕТЫН ЭЛЕКТРОН ВЕРСИЙЖЫМ «КЕВЫТЫШТЕ» (ТЕМДАЛЗА) НАЛАШ ЛИЕШ.