***
Оралген садеш шыма йолташ,
Лач тораш коеш кӱрен йолаш.
Вашталтен шӧртнялгышке ужгам,
Тудым мый тора гычак ужам.
Шочыктен йошкартыш мӱй олмам,
Шере тамым тӱрвыштем шижам.
Шуялтен, эн тамлыжым темла,
Келшыме йолташыжым шымла.
Пайленам шӱмемым шошо гоч,
Чон ойгемым, кеҥежшат ыш коч.
Лач оръеҥла, кумылем нӧлтен,
Олмапу чӱчкен ковыртатен.
Колыштале шуко, шып шоген
Пеленем шинчавӱдшат йоген.
А кунам вашлийым шӱмбелем,
Кушкылем ӧндальым шӱм пелен!
Лышташет йолгорным петырен,
Мамык лум ден кап — кылет ырен.
Кыдалетым ӧндалаш садак
Мый куржам садерышке адак.
Шыматале угыч шошо йӱр,
Лывыртен укшетым волгыжтӱр.
Ош садерыш пелашем ӱжам,
Пеледалтше йолташем ужам.
Елена Иванова.
Шыже вальс
Сӱанватыла ялтак ял писте чӱчка,
Шонанпыл гай вургемым чиен,
Легылден пыл шеҥгеч, йыштак кече вӱчка,
Ял воктене пӱртӱсым шымлен.
Шӧртнялгалше лышташ пуйто вальсым пӧрдеш,
Тошкем дене лойгалын эрден.
Шыже семым луктеш садерлаште мардеж,
Йӱклана куэрла сывын ден.
Поланвондо йошкар шер аршашым чиен
Шогылтеш ковыра ӱдыр гай.
Шыманрак мый налам кидышкемже, миен,
Ах, чурийже сӧрале могай!
Той тӱс ден волгалтеш ер воктен арама,
Тӱрлеман шке йолважым рӱзен.
Шогалтеш пӧрт пелен йытыра локама,
Шке вургемжым оръеҥла тӱзен.
Зоя Висвис
***
Вачышкем ваштар лышташ камвозо,
Шыже толмым шолып шижтарен.
Ну кузе тыгайым мый ом возо?
Чоныштем ю вийым тарватен.
Мый лектам оралгыше йолгорныш,
Кидыштем – мотор лышташ аршаш.
Ушыштемже тӱрлӧ-тӱрлӧ шоныш,
Пӱртӱсшат могай сӧрал улмаш!
Ошкылам мый шыжыш, ал кеҥежлан
Чеверласыме шомакым кычалам,
Тауштем саскан поян леҥежлан,
«Вес гана вашлийына» манам.
А кеҥеж пытартышлан ӧндале
Леве, озыркан мардежше ден.
Шӱлык кумыл, вучо, ит тол але,
Шӧртньӧ шыжым йӧратен коднем.
Надежда Эмыкан.
Поян шыже
Пеш поян улат тый, шыже,
Мокталташ лиеш, чынак.
Кӧ пашам ыштен кеҥежым,
Ӧпкелалт ок керт чылтак.
Тӱҥалына чевер редис гыч,
Ончыч шушо сай саска.
Чылалан келша, кӧ ок коч,
Чонланат лиеш ласка.
Киярат почеш огеш код,
Кечын шокшыжым шупшеш.
Кечым, йӱдым чылт ок шотло,
Минут йоткеак кушкеш.
Помидор нӧлталын вуйым,
Ужар вондыжым шара.
Чеверген мо але кӱын?
Тидым кочшо вел пала.
Шоганат кушкешыс талын,
Петырен йыраҥым вошт.
Шӱкшаклан огеш пу алым,
Коклаш пураш ынышт тошт.
А чеснокшо пуйто ӱдыр,
Ӱпшым сылнын пӱтыра.
Вияш гычын лийын кудыр,
Мотор коеш путырак.
Вес йыраҥым айлен реве,
Йоча-влакын тамле сий.
Шукырак кочкат гын веле
Погыналеш патыр вий.
Шып кия кугу кавун,
Пуйто шӱлалташ лӱдеш.
Нарынче – тугеже шуын,
Ит тол лишке – пудештеш.
Олмапулан пешак неле
Олмам тонн ден нумалаш.
Укш ок чыте, кая шелын,
Кӱлеш тудым чараклаш.
Шоптыр, вишне, виноград
Шуко сад-пакчазын уло.
Сливе, грушо да молат
Шочыт, лийже веле кумыл.
Пареҥге нур огеш йӧрате,
Йолагайым ик пырчат.
Шарла писын пӱтыралтыш,
Я уке гын, колорад.
Шекланен шогет йыраҥым,
Тудым жапыште корет –
Шуко пеш налат пареҥгым,
Опташат уке верет.
Ушмен погыш витаминым,
Ынде лукмым пеш вуча.
Мондынет гын медициным,
Таҥым тудын ден кучал.
Шыжын сийжым, поген налын,
Аралаш ме оптена.
Телым саскажым кучалын,
Тудлан таум ыштена.
Владимир Александров, Морко район, Чодыраял
Вашлиям ӧндалын
Салам, шыже! Мардеж пеш юалге,
Йӱштӧ юж кылмыктен пуалеш,
Вет теҥгече чыла ыле сае,
Таче чылт ынде теле толеш…
Вашлийнем ыле тыйым ӧндалын,
Куаналын! Ах, шыже, салам!
Таче йӱштӧ мардеж вел пуале
Пуйто шиже: чонемже ойган…
Мый палем, шыже пагыт ондалчык.
Ӱшанем! Эрла кече лектеш!
Идым тылзе, ӧршат койылдалыт
Пызлыгичкым пеш кочкыт чӱҥген…
Вашлиям тиде шыжым, ӧндалын,
Шӱмыштемже мардеж лыплана,
Таче йӱштӧ мылам, а эрлаже,
Ӱшанем, сылне пагыт вуча!
Светлана Кузнецова, Сергиев Посад ола.
Шӧртньӧ жап
Толын шуо шӧртньӧ шыже,
Оралген йырваш пушеҥге.
Ужар мландынат ынде
Тусшӧ лие нарынче.
Чӱчкыдынак йӱр йӱреш,
Поҥго куанен шочеш,
Чыла вере лавыран,
Путынек кава пылан.
Шуко кайык чоҥештен
Шокшо элышке каен.
Чон пуртӱс лоҥгаш ужеш,
Вет шыже пагыт сылне пеш!
Ольга Степанова. Морко район, Шап Унчо.
Йӧратем тӱням!
Кажне ийын шыжым кумылын вучем,
Календарьын лаштыкшым чӱчкыдын ончем.
Икымше сентябрь – мыланем пайрем!
Йоча-влакын толмыштым школышто вучем.
Ах, пӱртӱс ты татыште путырак сӧрал.
Нарынче, йошкарге… Чонемлан – пиал!
Йӧратем ты пагытым! Йӧратем тӱням!
Тау тиде илышлан! Тау авамлан!
Пуртӱсын юзо жапыште шочынам тӱняш.
Куэ лышташ, оралгыше, адак велеш йырваш.
Чевер лышташ коклаште йӧратем кошташ.
Шинчам кумем… Чоҥештышым мотор йомак тӱняш.
Аэлита Бычкова. Марий Турек район, Марий Купто.