28 апрель – Вашкеполыш пашаеҥ-влакын кечышт
Лишыл але уремыште йӧршын палыдыме еҥлан йӧсӧ лийын кая гын, эн ончыч вашкеполышыш йыҥгыртена. Параньга район Олор ялын ӱдыржӧ Татьяна Сенькина – Республикысе вашкеполыш станцийын операторжо.
Туддене пашаж нерген мутланена.
Т.Сенькина Параньга район Олор кыдалаш школын 9-ше классшым тунем пытарымеке, Йошкар-Оласе медколледжыште «Сестринское дело» направлений дене шинчымашым налын. 2021 ий октябрьыште вашкеполышышто ышташ тӱҥалын.
– Татьяна, операторын сомылжо могай?
– Мый оперативный отделыште пашам ыштем. Республикын тӱрлӧ районжо гыч йыҥгырым налаш перна. Айдеме деч кушто да мо лиймым, адресшым, лӱм ден фамилийым, ийготшым, йыҥгыртышын телефон номержым йодыштына. Но эн ончыч эҥгек кушто лиймым пален налаш кӱлеш, вет йыҥгыртыше дене кыл кӱрылтын кертеш, мутлан, телефонын зарядкыже трук шинчеш. А мыланна эн ончычак бригадылан кушко кайышашым палыман.
Икгай лӱман урем-влак республикыштына ятыр, черле айдемын могай ялыште, олаште улмыжым оператор йодын моштышаш. Кушко, могай адрес дене вашкеполыш машинам колташ чыла рашемдыман, тунам корнылан жапшат шагалрак кая. А черлым утарен кодымаште южгунам ик минутат пеш шергакан.
– А черле але сусыргышо уремыште гын? Але аварий лийме годым йыҥгыртыше деч мом умылтараш йодыда?
– Тыгай годым лишыл пӧртын адресшым каласыман. Тыгеат лийын кертеш: лишне нимогай пӧрт уке. Тунам воктен мо верланымым ойлыман: корнывож, корно меҥге, транспорт остановко, иктаж умылаш лийме вер (театр, кафе, кевыт, клуб да тулеч моло). Пациент деке миен шуаш йӧсӧ гын, йыҥгыртыше деч рашемдена: вашкеполыш бригадым нуно кушто вашлийын кертыт.
– Могай йодышлан чӱчкыдынрак вашмутым пуаш логалеш?
– Шуко йодышлан вашешташ перна. Кугу температур да давлений шотышто чӱчкыдын йыҥгыртат. Тыгай годым вашкеполыш машинам эрежак огына колто, ой-каҥашым гына пуэна.
Экстренный вызов лиеш, тыгай годым айдеме колен кертеш. Бригаде ӱжмӧ тат гыч 20 минут жапыште толын шушаш. Мутлан, айдеме ушым йомдарен але чурийже кенета шӧрын каен, кидшым нӧлтал ок керт. Нине симптом-влак инсульт лийын кертме лӱдыкшӧ нерген ойлат. Оҥ коршта, шӱлаш неле, юж ок сите, пациентын температуржо кугу гын, поснак йоча тыгай чер дене орлана гын, вашкеполышыш пеш содор йыҥгыртыман.
– Оператор могай койыш-шоктышан лийшаш?
– Тӱрлӧ койыш-шоктышан еҥ-влак йыҥгыртат, нуно лишыл айдемыштлан але уремыште йӧршын палыдыме еҥлан медполышым вашкерак пуышт манын шонат. Операторлан чылаштым умылен моштыман, ласка мут дене вашештыман. Эн тӱҥжӧ – айдемым утараш полшыман.
10-11 оператор тырша ик сменыште.
500 наре вызов лиеш суткаште Марий Эл мучко.
Наталья ТОКТАРОВА.
Фотом еш альбом гыч налме.