2024 ий мучаш марте Марий самырык театрым уэмден чоҥен шуктышаш улыт. Тушто кузе паша кайымым Марий Элым Вуйлатыше Ю.Зайцев ончал лектын.
Тудын палемдымыж почеш, кызыт объектыште паша график почешак шукталтеш. Театрыште реконструкций 2022 ийыште Российысе тӱвыра министерствын полшымыж дене угыч тӱҥалын, вет пашам 2017 ийыште жаплан чарыме улмаш. «Тӱвыра» нацпроект почеш тудым 2023 ийыште ачалаш тӱҥалме.
Тыште 1989 ийыште чоҥымо полатын фасадшым тӧрлатыме, конструкцийыште ситыдымашым кораҥдыме, леведышым вашталтыме. Уэмдыме театрыште технологий шот дене сай спектакльым шындаш йӧн уло. Шым йӧнан гримёрный, тыгак репетиционный ден кушташ келыштарыме зал-влак лийыт. Тыгак проект почеш декорацийым, реквизитым да костюмым аралаш ешартыш верым ыштышаш улыт.
Театрым ачалаш федеральный бюджет гыч 461 млн утла теҥгем ойырымо, республикысе бюджет гыч – 197,6 млн теҥгем. Кызыт объект 66 процентлан ямде. Реконструкций деч вара театрын кумдыкшо 2,3 пачаш кугемеш да 9,3 тӱжем квадратный метрыш шуэш. А зрительный залыш 200 наре еҥ пура.
Фото Марий Элысе Правительствысе пресс-службын.