Рӱдоласе аэропортышто чоҥалтше пассажир терминалым Марий Элым Вуйлатыше Ю.Зайцев ончалын савырнен.
Ты жаплан у терминал 50,5 процентлан ямде. Тудым леведме, окна-влакым ыштыме, фасадысе пашам пытарыме. Кызыт кӧргыштӧ кыдеж-влакым келыштарат, отделке пашам да инженерный системе монтажым ыштат. Объектыште 100 наре еҥ тырша. Ик кечыланат пашам чарен огыт шогалте.
Аэропортлан кӱлешан оборудований-влакым налме. У терминал 6 тӱжем квадратный метр кумдыкышто кок пачашыште лиеш, тушто марий орнаментымат келыштарат.
У терминал аэропортыш толшо 400 наре пассажирым ик шагатыште вашлийын-ужатен кертшаш. Тудо тений идалык мучашлан ямде лийшаш. 2023 ийысе 10 тылзыште 2019 ий тыгаяк жап дене таҥастарымаште 13 тӱжем пассажирлан шукырак лийын. А реконструкций деч вара тидыже ныл пачаш ешаралтшаш.
У терминал деч посна чоҥештен кӱзымӧ да шичме полосам ачалат. Тылеч вара аэропорт 200 еҥ пурымаш юж судно-влакым вераҥден кертеш. Терминалым да саде полосам уэмдыме йодыш Федераций Советыште Марий Эл Республикын кечыштыже ончалтын. Аэропортым уэмдыме сомыл Марий Элым социально-экономически вияҥдыме посна программе почеш шукталтеш да калыклан моткоч кӱлешан.