«Царамис» мурышо да куштышо ансамбль икмыняр гана Марий Эл республикын районлаштыже да рÿдолаште концертым ончыктен, калыкым куандарен. Тÿрлö калык сем почеш йоча-влакын тыге чаплын тавалтен колтымыштым ужмеке, чылт öрат. Мыняр вий-куат, мыняр мастарлык!
Ансамльын участникше-влак Удмурт республик Алнаш районын тÿрлö яллаштыже илат, нуно Варале ялысе тÿвыра пöрт пелен арняште икмыняр гана репетицийым эртарат. Тышке тÿрлö ийготан йоча-влак погынат, эн изи икшыве эше йочасадыш веле коштеш, тудлан куд ий веле!
Икшыве-влакым тыге мастарын кушташ да мураш Варале тÿвыра пöртын вуйлатышыже Анатолий Семёнов туныкта.
– «Царамис» 2016 ий июль гыч пашам ышта. Тунам мый клуб вуйлатышылан шогалынам. Икана пашаш толмем годым клуб кудывечыште йыр шогалын, калай банкым вашла чумен модшо йоча-влакым ужым. Чонемлан каньысырын чучо. Икшыве-влак деке миен, палыме лийым, кушташ тунемаш кошташ ÿжым. Тыге икымше гана погынышна… Варажым йоча-влак ешаралтыныт веле. Кызыт ансамбльыш 16 икшыве коштеш. Южыштын илыме ялышт 12 меҥге марте тора гынат, репетицийым нигö огеш кодо.
Ме тÿрлö вере мастарлыкнам ончыктена. Озаҥыште, Сочиште, Москваште эртаралтше тÿнямбал конкурслаште лауреат лÿмым налынна. Эстонийыш каяш шонымаш уло, – мане Анатолий Николаевич.
Тыгай уста, куатле шÿлышан ансамбльлан волгыдо илыш-корным, у деч у сеҥымашым тыланен кодына!
