Судитлыме еҥ-влак коклаште ынде икмыняр ий «Калина красная» муро конкурс эртаралтеш. Кодшо кечылаште тыгай XIX конкурсым иктешленыт. Лауреат-влак коклаште — Марий Элысе 6-шо №-ан исправительный колоний гыч Валерий Окунев.
Иктешлымашым видеоконференцкыл режим дене эртареныт. Россий ФСИН директор А.Гостев конкурсын организаторжо ден участникше-влаклан тауштен да конкурсын кӱлешлыкшым палемден.
Тудо кечын Марий Элысе 6-шо №-ан ИК денат видеокыл лийын, вет В.Окунев финалыш лекше 22 еҥ радамышке пурен, садлан тудат сеҥыше лӱмым налын.
Сеҥыше-влакым палемдымаш гала-концерт семын эртаралтын, ончышо-влак кажне финалистын мурымыжым ончен кертыныт. Валерий Окунев тушто шке возымо «Глоток свободы» мурыжым мурен.
Трансляций пытымеке, 6-шо №-ан ИК-м вуйлатышын пашажым жаплан шуктышо Р.Сафин Валерийлан шере пӧлекым кучыктен да лишыл еҥже-влак дене вашкерак вашлияш тыланен. Тидлан амалжат уло — пӧръеҥ тений декабрьыште наказанийым вашталтыме шотышто судыш ходатайствым пуынеже. Тудым колоний гыч исправительный рӱдерыш колтен кертыт.
Марий Элысе УФСИН гыч налме фото.