Леонид Васильевич Яковлев – Морко район Ӱшӱттӱр ялын пагалыме еҥже. Тудо йочаж годсек вольыкым ончен тунемын. Вольыкым йӧратымаш – Леонид Васильевичын вӱрыштыжак. Тудын кочажат, ачажат ушкалым, презым, эсогыл мӱкшым онченыт. Икманаш, паша деч лӱдын огытыл.
Л.Яковлев, 2013 ийыште, кундемыште ялозанлыкым вияҥдаш манын, кугыжаныш деч грантым сеҥен налын ыле. Пошкудо Изнур ялыште ушкал фермым ыштен. Тушто 30 наре ушкалым, тунам, презым ончен. Ик пашаеҥже лийын. Татьяна пелашыж дене эр йӱдымак кынелын, ушкал лӱшташ коштын. Шӧрым Моркыш сдатлен, пытартышлан Советский районыш Роҥгыш коштыктен. Вара шӧрым погымым чарненыт. Амалже – еҥ-влак ушкалым ончымым чарненыт. Леонид Васильевичат, илен-толын, ты паша деч кораҥын. Кызыт ӱшкыж-влакым онча. Тыгак кандаш вуй шорык уло.
– Вольыкым куанен ончем. Но чылажат тазалык деч шога. Вет ялозанлык паша йолагайым ок йӧрате. Мӱкш гай йӱдшӧ-кечыже пашам ыштыман. Кургымат жапыштыже ямдылыман. Вольыклан прививкымат ыштыман. Кеч-могай пашам пален, умылен виктарыман, – ойла Леонид Яковлев.