Тӱрлӧ кочкыш да йӱыш дене пырля айдеме кечыште 2,5 литр вӱдым йӱшаш, а чот шокшо годым – 3,5 литрым.
Организмлан вӱдын мыняр кӱлмыжӧ южын температуржо да вӱдыжгылыкшӧ дене гына кылдалтын огыл, пашан нелытшымат шотыш налман. Физический пашам ыштыме годым 4 литр марте вӱдым йӱман, а чот шокшышто тыршаш логалеш гын, 5 литр нарат.Кече йымалне чот неле пашам шуктымо годым организмлан суткаште 6-6,5 литр наре вӱд кӱлеш.
Южгунам вӱдым шагалракат але, мӧҥгешла, шукыракат йӱман. Гипертоний дене орланышылан таза еҥ наре йӱман огыл, давлений кенета кӱзен кертеш. Верге чер-влак: верге ситыдымаш, гломерулонефрит, фосфатурий – улмо годымат вӱдым шагалрак йӱман. Черле вергылан организм гыч вӱдым лукташ неле, садлан утыжо организмыште погына, тыге айдеме кӱпна, шӱмлан уто нелыт возеш.
Йӱмӧ шумо годым яндар вӱдым але шере огыл ужар чайым йӱаш тыршыман. Пӱжалтме годым организм гыч шинчал да микроэлемент-влак каят. Нуным уэш ешараш манын, южгунам изиш шинчаланрак вӱдым, минеральный щелочной вӱдым, нугыдо огыл шӧрым, тувыртышвӱдым, витаминан напиткым, кислородно-белковый коктейльым йӱаш пайдале.