Козьмодемьянск олаште шочшо Татьяна Малинина (ӱдыр фамилийже – Артюшкина) ик идалык ончыч пидме-тодмо кидпашалан шӱмаҥын.
Тӱня мучко
Кызыт Татьяна Параньга район Ермучаш ялыште шке ешыж дене ила. А илыш пӱрымаш тудым Россий мучко коштыктен манаш гын, чын лиеш, шонем. Ик ияш гыч кандаш ияш марте пиалан йоча жапше Ростов областьыште эртен. Тушко ачаж ден аваже Татьянан шочмекыже илаш кусненыт.
Шочмо кундем верч сагынен пӧртылмеке, Советский районышто ныл ийлан лакемыныт. Ешын вес илыме верже Самара область лийын. Тушко ачаже отпуск жапыште каен, келшенат, уло ешыжым наҥгаен. Тиде кундемыште ӱдыр 7-ше гыч 11-ше класс марте тунемын.
Тылеч вара Татьяна Марий Элыш толын да Йошкар-Оласе технологический колледжыш тунемаш пурен. Тушто «Пушеҥгым обрабатыватлыме производствын технологшо» специальностьым налын. Тыгодымак ӱдыр шке йӧратымашыжым вашлийын. 2000 ийыште Дмитрий ден Татьяна сӱаным ыштеныт. Нуно шым ий Йошкар-Олаште иленыт. Тунам Татьяна производствышто тыршен.
2006 ийыште Малининмытын икымше ӱдырышт шочмеке, пелашыжын шочмо верышкыже – Параньга район Ермучашыш – куснаш кутырен келшеныт. Эн ончыч самырык мужыр поро кумылан, мудреч авашт дене иквереш илен. А 2009 ийыште шке пӧртым чоҥаш тӱҥалын. Татьянан пелашыже торашке коштын. А озавате строительный кевытыш ужалкалышылан пашам ышташ пурен. Кызыт тудо Параньгаш кудалыштеш, быт технике кевытыште управляющийлан пашам ышта.
2015 ий Малининмытлан эше кок пӧлекым ыштен: еш у пӧртышкӧ илаш куснен да кокымшо ӱдырышт ош тӱням ужын.
Усталык шӱлышан
– Мый шкемым творческий айдемылан шотлем. Йоча годым художественный самодеятельностьышто эре выступатленам, спорт дене кылым кученам: ече дене коштынам, волейбол да ӱстембал теннис дене модынам. Тӱрлӧ кидпашам шуктен онченам. Но шуко жаплан огыл. Иктаж кок ий ончыч интернетыште искусственный ротанг гыч пидме кашпом ужынам да шинчам кораҥден кертын омыл.
Пидаш шонымаш кӧргыштӧ шуко жап «илен», вуйышто пӧрдын. Тыге кодшо шошым ротангым, кӱлеш материалым нальым да пидаш тӱҥальым. Чынже денак тиде сомыл путырак келшен шинче. Тӱҥалам да чарненат ом керт. Тыге лиеш манын шоненат омыл. Южгунам, мутат уке, каналтем, – каласкалыш Татьяна.
– Мо дене ты паша Тендам сымыстарен?
– Молан келша, йодыда? Эн ончычак мый Курыкмарий район гыч улам, а тушто акрет годсек арама воштыр гыч арверым ыштыме сомыл вияҥын толын. Озанлыкыштына арама гыч ятыр погым ужын кушкынам. А корзиҥгаже могай кугытан гына лийын огыл?! Ковам мыйым пазарыш пырля эре коштыктен. Ме туддене мӧрым, сливым, олмам корзиҥгашке оптена да вӱдварашке сакалтена ыле. Тылеч посна воштырым пидме мастарлык тукымвож да вӱр денак шыҥен. Сандене тидыже кумылем путырак нӧлта. Тодмо паша ала-могай ойыртемалтше толкыныш вӱден пурта, илышысе да пашасе нелылыкым ӧрдыжыш кораҥда.
Ямдылкалыме процессым шукташ пелашем кугунак полша. Тидыже жапым да вийым аныкла.
Чынжымак, кеч-могай сомылым шуктымаште эҥертыш да полышкалыше кӱлеш. А варажым лектышыжым ончен куанет! Вет мастар еҥын кидыштыже моторлык шочеш!
Искусственный ротанг гыч ыштыме арвер вӱд деч ок лӱд, вӱдыжга гынат, ок локтылалт, огеш катле да шке сӧраллыкшым огеш йомдаре. Сылне улмыжланак кӧра тӱрлӧ пӧлемыш вераҥдаш лиеш. Сандене Татьяна Малинина тиде сӧрал да пайдале усталыклан тунемаш темла. Арверым кидмастар дечат налын кертыда.
Эльвира Терентьева.
Т.Малининан альбомжо гыч налме фото-влак.