Марий Элым Вуйлатыше Ю.Зайцев, республикыштына вӱдшор лийын кертмым шекланаш манын, Марий Эл мучко вертолёт дене чоҥештыл савырнен.
Кызыт кундемыштына вӱдшор шотышто лӱдыкшӧ уке, вӱд чот кугун нӧлталалтын огыл. Шошо вӱд ташлымашым Марий Эл Правительстве да посна службо-шамыч тергенак шогат. Вӱд 8 апрельыште эн чот ташлен, тидыже кодшо ийысе деч 9 кечылан ондакрак. Лум эр шулен да вӱд ташлен гынат, ӱмашсе деч тудо 30 сантиметрлан шагалрак нӧлталалтын. Вӱдлан ташлаш икмыняр амал полша: южын температуржо кенеташте кӱза, лум але йӱр опта.
Марий Элым Вуйлатыше шошо вӱдшор годым калыкын илышыжым лӱдыкшыдымым ыштыман манын палемден.