Звенигово районын прокуратуржо еҥ-влакын йодмышт почеш Звенигово оласе муниципальный унитарный предприятийын вӱдым пуэн шогымыжым терген.
Пале лийын: 2022 ий 19 сентябрьыште эрдене водоснабженийыште аварий лиймылан кӧра йӱштӧ вӱдым йӧртымӧ. Олаште илыше-влак ныл шагат утла вӱд деч посна шинченыт, а закон почеш тыге лийшаш огыл. Тергымаш годым тений сентябрьыште лийше эше кум тыгай случай нерген пален налме.
Звенигово районын прокуратуржо предприятийын директоржылан представленийым луктын. Тудо але ончалтеш.
Тылеч посна прокурор предприятийын директоржо шотышто РФ КоАП-н 7.23 статьяж (калыклан коммунальный услугым пуымо нормативым пудыртымаш) почеш административный правонарушений шотышто делам тарваташ пунчалым луктын. Тудым тергымашым эртарыме материал дене пырля Марий Элысе Кугыжаныш жилищный надзор департаментыш ончаш колтымо.
Ситуацийым прокуратур терген шога.