2024 ий – Ужар Пу Драконын идалыкше. Дракон вий-куатын символжылан шотлалтеш. Тудо нелылыкым сеҥен лекташ да шонымашке шуаш полшышо энергийым конда. Вес ий – шындыме цельыш шуаш, шке амбицийым илышыш шыҥдараш келшыше жап. Тыгодым ида мондо: сеҥымашке шуаш шагал огыл тыршыман, вийым пыштыман.
Ужар Пу Дракон идалыкым вашлийме годым мом шотыш налман? Ты йодышлан вашмутым рашемдена.
Мом чийыман?
Пайрем вургемым ойырен налме годым шарныза: Драконым Китайыште поснак пагалат, садлан эрвел эллаште тӱс-влакын мом ончыктымыштым шотыш налман.
Ужар тӱсын кеч-могай сынже (ошалге ден шемалгыжат, шинчам йымыктарыше ужаргыжат) келшен толеш. Ужар тӱсым тӱрлӧ стильлан келыштараш лиеш. Тудо гармонийым, илыш пеледмашым, ум ончыкта. 2024 ийыштат ты тӱс кӱлешан лийын кодеш. Оливке сынан ужар да хаки тӱс вургемлан ойыртемалтше образым чоҥаш полша, нуно моло тӱс дене сайын келыштаралтыт.
Шемалге-канде тӱсан вургемым чӱчкыдын чийыше еҥым шуэн вашлият, садлан тыгай айдеме моло-влак коклаште поснак ойыртемалтеш. Эрвел кундемыште тиде тӱс кӧргӧ чон поянлык дене пеҥгыдын кылдалтын. Фиолетовый тыгак мудречын тӱсшылан шотлалтеш. Тудым канде, ужарге, кына тӱс-влак дене келыштараш лиеш.
Йошкар тӱс мемнан дене веле огыл, моло элыштат кажне У ий пайремлан вашлиялтеш. Китайыште ты тӱс сеҥымашым, пиалым, сай илышым ончыкта, ты тӱс кажне пайрем годым тушто озалана. Йошкар тӱсан вургемым чийыше еҥ шинчалан вик перна. Но образым ямдылыме годым тудым моло тӱс дене келыштарен моштыман. Мутлан, шеме, сур, ошо але бежевый вургемым чийыме годым йошкар тӱсым акцент семын кучылташ лиеш.
Шӧртньӧ тӱс поянлыкым ончыкта, тыгай сынан вургемым кугу пайрем годым гына чият. Мифлан ӱшанаш гын, дракон йылгыжше да шергакан куэмым йӧрата, садлан шӧртнялге тӱсан вургемым чийыше-влакым вес ийын сеҥымаш вуча. Шӧртнялге сынан аксессуарым ешарыме денат образ ойыртемалтеш. Тӱҥжӧ – шӧртньӧ тӱс утыждене шуко ынже лий.
Аксессуар. Пайрем вургемлан аксессуарым ойырен налме годым 2024 ийын символжо нерген мондыман. Мутлан, кишке тувыран принтан изи сумка, стразе дене сӧрастарыме драконын сӱретше. Моло сӧрастарышым ончалаш гын, кугурак алга, кӱжгӧ браслет, колье, драконан подвеске пайрем образым сӧрастараш келшен толыт.
Макияж
У ий пайрем макияж шинча тӱслан келшен толшаш.
Сур шинчан еҥлан тыгаяк сынан, тыгак ошалге-канде, ошо, шӧртньӧ, персик сынан тень дене пайдаланыман. Ужар шинчан-влаклан кӱрен, той, ужар сынан теньым кучылтман. Канде шинчан ӱдыр-шамычлан макияжым ыштыме годым кӱреналге-кына, бордо тӱс-влак келшен толыт. Шинчада шемалге гын, кына але шӧртнялге тӱсым ойырен налза. Пайрем макияжыште йылгыжше тень уто ок лий.
Шинчагомдыш теньым шагалрак пыштеда гын, тӱрлӧ тӱсан стрелкым сӱретлаш лиеш. Шинчаш вигак перныше макияжым ыштынеда гын, тӱрвым йошкар помаде (шӱргӧ тӱслан келшыше сыным ойырен моштыман) дене чиялтыза.
Пӧрткӧргым сӧрастарена
Шушаш ийын стихийжылан пу шотлалтеш, тӱҥ тӱс – ужарге. Пӧртым У ийлан сӧрастарыме годым астролог-влак тидым шотыш налаш темлат. Мутлан, ӱстембаке пу статуэтке-влакым шындылаш лиеш. Йырым-йыр утларакшым ужар тӱс озаланышаш. Пӧртым тӱрлӧ тӱсан тасма, кагаз гыч ыштыме фонарик дене сӧрастарыза. Дракон символан элемент-влак нерген ида мондо. Мутлан, омсаш сакаш драконым сӱретлыман подвескым ямдылаш келшен толеш.
Китайыште дракон – император кучемын символжо, садланак 2024 ийым поян да моторын вашлийман. Пӧртым сӧрастарыме годым янда шарым, тӱрлӧ тӱс дене чолгыжшо гирляндым кучылтса. Тыгак йошкарге, нарынче, ужар тӱсан китайский фонарикым вераҥден кертыда.
Пайрем ӱстелым ямдылыме годым Драконлан келшыше тӱс-влакым кучылтса: ужаргым, йошкаргым, шӧртньым. Ош тӱс деч шекланыза – Китайыште тудо траурныйлан шотлалтеш. Ӱстелыш ты ийын символикыжым сӱретлыман салфеткым, кӱмыж-совлам вераҥдыза.
Пӧлек
Ужар Пу Драконын кумылжым савыраш манын, У ийлан родо-тукым да лишыл еҥ-шамычлан пу гыч ыштыме кӱмыж-совлам, сӧрастарыш-влакым пӧлеклаш лиеш. Пӧлек ужар тӱсан гын, сайрак, мутлан, окна ончылно кушшо кушкыл.
Могай сийым ямдылыман?
Ямдылыме кочкыш коклаште шыл, кайык, кол да пакчасаска сий-влак лийшаш улыт, фрукт ден шере кочкышат ӱстембалне лийшаш улыт. Ӱстел сий поян да мотор лийшаш. У ий пайрем менюшто тыгай кочкыш-влак лийшаш улыт:
– кӱрка шыл дене тӱрлӧ салат;
– муно дене ямдылыме салат-влак;
– тӱрлӧ закуско;
– жаритлыме рис;
– эрвел рецепт почеш ямдылыме жаркой;
– фрукт дене ямдылыме десерт-влак.
Шотыш налза
Пайрем ӱстелыште кролик але мераҥ шыл гыч ямдылыме кочкыш лийшаш огыл. Полуфабрикат дене ямдылыме сий утыждене ынже лий – тыге те пиалым лӱдыктен кертыда.
Авокадо да чыве шыл салат
Кӱлыт: шолтымо кок чыве оҥ шыл, кок авокадо, пел вуй шоган, 100 г консервироватлыме кукуруз, петрушко, кок кугу совла оливке ӱй, тынарак лимон сок, шинчал, йоҥыштымо шем пурыс.
Чыве шылым шолтыза, йӱкшымекыже, вичкыжын пӱчкедыза. Авокадом шӱмжӧ да томжо деч эрыктыза, тыгыде кубик семын пӱчкедыза. Шоганым тыгыдын пӱчкедыза, петрушкым тыгыдемдыза. Кукурузым да моло ингредиентым ешарен, сайын варыза.
«Драконын тулжо» салат
Кӱлыт: 300 г чыве шыл, корейский рецепт почеш ямдылыме 150 г кешыр, ныл пареҥге, кум свежа кияр, ик йошкар шере пурыс, майонез, шинчал.
Шолтымо пареҥгым шолдыра тёрко гоч нӱжыза. Шылым шолтыза, тыгыдын пӱчкедыза. Киярым кужу кутышын пӱчкедыза, шинчалым шавалтыза да, 10 минут шинчыктымеке, лекше кияр вӱд деч шӱрен налза. Пурысым тыгак кужу кутышын пӱчкедыман.
Салатницеш ингредиент-влакым лончо дене оптыза: чыве шыл, кияр, пареҥге, кешыр. Кажне лончыш майонезым шӱрыман. Салатым тулйылме формо семын келыштарыман да пурыс дене сӧрастарыман (фотосо семын).