Ола деч тораште огыл илем. Ушкалем уло. Ола пазарыш шӧр-торыкым ужалаш чӱчкыдын коштам. Ондак тылзылан ик гана шке районыштак ужалышаш кочкыш-йӧрварым анализлан сдатлена ыле. А ынде пазарыште эше ала-могай анализым йодыт, но могайым, шкештат раш огыт умылтаре. Ала газетда гоч рашемдаш полшеда: шке шӧр-торыкым ужалаш манын, мом ыштыман?
Людмила.
Оршанке район.
Марий Эл Республикысе вольык, янлык чер ваштареш кучедалме шотышто станцийын пӧлкажым вуйлатыше Елена Еремеева вашешта:
– Пазарыште шӧр да шӧр кочкышым ужалаш манын, эн ончычак кугыжаныш ветеринар учрежденийын специалистше деке кайыман. Тудо тыгай пашам шукта:
ü ушкал нерген сведенийым «ВетИС» ветеринарий аланысе федеральный кугыжаныш информационный системыште аралалтше учётный базысе бирке номер дене терга;
ü ушкалым онча, шылше маститлан шымла, куснылшо чер-влаклан (бруцеллёз, туберкулёз, лейкоз) плановый диагностический шымлымаш-влакын результатыштым да сибирский йора, орымаш чер-влак ваштареш ыштыме профилактике прививке-влакын данныйыштым терга.
Тыгай тергымаш-влак деч вара специалист ветеринарный сопроводительный документым (ВСД) мӧҥгӧ гыч пазар марте каяш ышта.
Шӧр да шӧр кочкыш вашке локтылалт кертшылан шотлалтыт, садлан кажне партий (кленча але печке, банке, фляге да тулеч моло) шӧр да шӧр кочкыш ветеринарно-санитарный экспертизым пазар лабораторийыште эртышаш.
Тылеч посна:
ü шӧрым 10 кечылан ик гана СОМО 25% ден соматический клетке-влаклан тергыман;
ü тылзылан ик гана – бруцеллёзлан;
ü куд тылзылан ик гана – антибиотиклан, радионуклидлан да микроорганизмлан.
Нине тергымаш-влакым Йошкар-Олаште республикысе ветеринарный лабораторийыште, тыгак Советскийысе, Шернурысо, Марий Турекысе, Козьмодемьянскысе, Волжскысо, У Торъялысе ветстанцийлаште ышташ лиеш.
Тергымаш-влакын данныйышт лиймеке, ветеринарно-санитарный экспертизым ыштымеке да пазарысе лабораторийыште заключенийым налмеке, шӧрым да шӧр кочкышым ужалаш лиеш.
Икманаш, шӧрым ужалаш ветеринарный сопроводительный документ, тергымашым эртыме протокол-влак (чылаже кумыт – 10 кечылан, ик тылзылан да куд тылзылан) кӱлыт.