Тӱткӧ лийза!
Шоя окса нерген
Тений 9 тылзыште Марий Элыште 28 шоя банкнотым верештме.
Мумо банкнот кокла гыч шукыжо (23-шо) 5000 теҥгеаш купюр лийын, ныл банкнот – 1000 теҥгеаш да иктыже – 2000 теҥгеаш. Тыгак 100 доллараш ик купюрым мумо. Кагаз оксан шоя улмыж нерген шонымаш лекме годым кеч-могай банкыш экспертизыш сдатлаш лиеш.
Спорт
Футболла модса веле!
2020 ийыште Козьмодемьянскыште куржталаш келыштарыме корным да искусственный футбол пасум ыштат. Тыгак Звенигово район Красногорский посёлкышто стадионым уэмдат да тушан искуссвенный газоным вераҥдат.
Кызыт Йошкар-Олаште искусственный газонан кум да Волжскышто ик футбол пасу улыт. «Демография» нацпроектын «Спорт – норма жизни» федеральный проектше почеш Семёновка селаште верланыше Олимпийский резерв училищылан40х60 метр кумдыкан площадкым ыштат, тушан искусственный шаршудым шарат.
Шарныктыш
Эшпай, Колумб да Петров
Общественный да кугыжаныш пашаеҥ Иван Петровлан, композитор Андрей Эшпайлан да поэт Валентин Колумблан памятник-влакым ямдылыме шотышто проект конкурсым увертарыме.
Шарныктыш скульптур-влакым Йошкар-Олаште вераҥдаш шонат. Проект-влакым 2020 ий 19 февраль йотке налыт. Конкурсым Марий Элын тӱвыра, печать да национальность паша министерствыже ден «Научно-производственный центр по охране памятников» учреждений эртарат.
Тӱрлӧ увер
Тений Йошкар-Олаште коньки дене мунчалташ верым Сеҥымаш паркыште келыштарат. Кызыт тушто 35х35 кв метр кугытан коробкым, коньким прокатыш налме, тудым чийыме-кудашме изи пӧртым ыштыме.
20-22 ноябрьыште Москошто ВДНХ-ште «Абилимпикс» V национальный чемпионатын финалже эртаралтын. Тушто 62 тӱҥ да 31 презентационный компетенцийыште таҥасеныт. Марий Эл гыч мийыше еҥ-влак 7 наградым конденыт. «Предпринимательство» компетенцийыште индустрий да предпринимательстве колледжын студентше Д.Молотов икымше верым налын.
21 ноябрьыште Юрино посёлкышто Г.П.Лосев лӱмеш историко-художественный музей шке омсажым почын. Ты пайремыште Юрино район администрацийым вуйлатыше М.Шихова ден Г.Лосевын Зинаида пелашыже символический йошкар тасмам пӱчкыныт. Тоштерыште 1200 утла экспонат уло, тышеч 724 предметше – посна коллекцийла гыч.
Йошкар-Олаште «Зелёный город» конкурсым иктешлыме. Кок номинацийыште кум эн сай верын представительже-влаклан грант ден грамотым кучыктат. «Лучшее вертикальное озеленение общественной территории» номинацийыште Бауман уремысе 19-ше №-ан «Василёк» йочасад ойыртемалтын. Шуко пачашан пӧртысӧ кудывече-влак коклаште Красноармейский уремысе 21-ше №-ан пӧрт воктенысе верым эн сӧраллан шотлымо.
Пенсий фондын Морко районысо управленийыштыже электрон черет дене пайдаланаш тӱҥалыныт. Кызыт терминал воктене талоным налаш консультант полша. Кажне кечын управленийыш кокла шот дене 60 еҥ толеш. Такшым Морко районысо управлений 36 тӱжем наре еҥым обслуживатла, тышеч пенсионерже – 10 тӱжем наре.
Кодшо кугарнян Марий Турек район Кугу Карлыган ялыште ачалыме тӱвыра пӧртым торжественно почмо. Тыште тӧрлатыме пашам вич ий наре шуктымо: окнам, омсам, кӱварым вашталтыме, вес леведышым ыштыме, пураш у омсам йӧнештарыме, фасадым уэмдыме. Ты тӱвыра пӧртыштӧ Удмурт тӱвыра рӱдер верланен. Тылеч посна 22 творческий объединений пашам ышта. Библиотекыште электровоштырым, сценыште да моло вереат 46 осветительный приборым вашталтыме. Сандене тӱрлӧ выступленийым ончыкташ йӧн уло. Ты кечын районысо зритель-влаклан Э.Сапаев лӱмеш опер да балет театр «Шелкунчик» балет дене куандарен.
29 ноябрьыште Йошкар-Олаште изосымыктыш тоштерыште Россий художник ушемын членже В.И.Мамаевын ончерже почылтеш. Тудо авторын 55 ияш лӱмгечыжлан пӧлеклалтын. Художник утларакшым пейзажым сӱретла.
22 ноябрьыште Морко район Шӱргыял школын йочасадыштыже воспитатель ден ача-ава-влаклан районысо семинар эртаралтын. Участник-влак Шӱргыял школысо этнографий тоштерым ончен лектыныт. Верысе йочасадын воспитательже А.В.Сергеева Ава кечылан пӧлеклалтше «Эн сай ава» мероприятийым ямдылен. Морко районысо методушемым вуйлатыше Н.А.Ильина да семинарын участникше-влак А.В.Сергееван пашажым кӱкшын акленыт.