27 декабрьыште Утарыше-влакын кечышт палемдалтеш. Шке пашашт дене кылдалтше ты пайремым Рӱдоласе бизнес колледжын чрезвычайный ситуаций годым аралыше лияш ямдылалтше студентше-влакат палемденыт.
25 декабрьыште ты бизнес колледжыште Марий аварийно-утарыше службым вуйлатыше А.Беляев, «Всероссийский студенческий корпус спасателей» ушемын Марий Элысе пӧлкажым вуйлатыше Н.Иванова студент-утарыше-влакым саламленыт, курсант-влаклан тауштеныт.
Рӱдоласе бизнес колледжыште тунемше-шамыч лӱдыкшӧ ситуаций годым эре гаяк пашам ыштат: чодыра йӱлымӧ годым тул ваштареш кредалыт, утарыше пашаеҥ-влак дене пырля йомшо еҥ-влакым кычалаш полшат, ий йымак пуреҥгайыше-влакым утарыме ученийлаште лиедат. Студент-влак икымше полышым пуэн моштымо шотышто таҥасымашлаш коштыт, туткар лийме верыште утараш туныктымо лекций-влакым эртарат.
Тылеч посна курсант-влак каратэ дене заниматлат, таҥасымашлаште ончыл верыш лектыт. Теве Виталий Антропов 18-19 декабрьыште всестилевой каратэ дене Российысе таҥасымаште 3-шо верым налын, Денис Бармин 9-11 декабрьыште Российысе патриотизм шӱлышан форумыш миен коштын, а Иван Источников – Йошкар-Ола мерын стипендиатше.
Бизнес колледжын студентше да пашаеҥже-шамыч Утарыше-влакын профессиональный пайремышт дене ты сомылым шуктышо кажне еҥым саламлат! Те кажне кечын тыглай айдемылан геройло гай чучшо пашам шуктен шогеда. Те еҥ-влакын илышышт верч мутым кучеда, шке пашадам чон пуэн ыштеда. Тидлан тауштена!
Оксана Геннадьевна Купцова,
филологий шанче кандидат,
МОСИ-се шанче да проект паша шотышто проректор,
МарГУ-со романо-германский филологий кафедрын доцентше.